Ekuador: vdiq kardinali i Quitos, Vela Chiriboga
R. SH. - Vatikan
Ndërroi jetë dje, më 15 nëntor, kardinali Raul Eduardo Vela Chiriboga, Kryeipeshkëv nderi i Quitos. Ishte 86 vjeç, pra jo zgjedhës në Konklavin e Kardinajve. Njoftimin e jep Konferenca ipeshkvnore vendase, duke kërkuar lutje për shpirtin e tij e duke cituar një fragment nga Ungjilli sipas Mateut mbi “shërbëtorin e mirë e besnik” .
Mesha e Dritës për shpirtin e kardinalit të ndjerë Chiriboga do të kremtohet më 17 nëntor, në orën10.00, pranë katedrales metropolitane të Quitos.
Një jetë, në shërbim të Krishtit e të Kishës së Tij
I lindur në Riobamba, më 21 janar 1934, i pesti ndërmjet 9 fëmijëve, fillimisht studion në kolegjin salezian të vendlindjes e në Seminarin e Quitos. Më pas, për të thelluar formimin e tij teologjik, baritor e liturgjik, vijon studimet edhe jashtë vendlindjes, në Bogotà, Madrid e Buenos Ajres.
I shuguruar meshtar më 28 korrik 1957, më 20 prill 1972 është ipeshkëv ndihmës i Guayaquil. Më 8 korrik 1989 emërohet Ipeshkëv ushtarak për Ekuadorin e, më 21 mars 2003, Kryeipeshkëv i Quitos, ku i kushtohet me pasion edukimit të të rinjve. Hap edhe një klinikë mjekësore për priftërinjtë e sëmurë.
Më 11 shtator 2010, në moshën 76 vjeç, paraqet kërkesën për dorëheqje nga drejtimi baritor i kryedioqezës së Quito-s ndërsa, më 20 nëntor të të njëjtit vit Papa Benedikti XVI e krijon kardinal, me titullin e Santa Maria in Via. Në vitin 2013 është i pranishëm në Konklavin, që zgjedh Papën Françesku.
Përditësim i Kolegjit kardinalor
Me vdekjen e kardinalit Raùl Eduardo Vela Chiriboga Kolegji kardinalor numëron 217 kardinaj nga të cilët 119 me të drejtë zgjedhore e 98 pa këtë të drejtë. Me vdekjen e kardinalit Chiriboga, Ekuadori nuk figuron më ndërmjet vendeve të përfaqësuara në Kolegjin kardinalor. Vendet që përfaqësohen tani janë 87. Ndërmjet tyre, edhe Shqipëria, me kardinalin Ernest Simoni Troshani.