Selia e Shenjtë: të mbrohen të drejtat e të moshuarve, edhe në kohë pandemie
R. SH. - Vatikan
Të drejtat e njeriut nuk kanë moshë, prej këndej shëndeti i të moshuarve duhet mbrojtur, ashtu si shëndeti i të gjithëve, posaçërisht në kohën e Pandemisë së Covid-19: kjo, thënë përmbledhtas, është thirrja e kryeipeshkvit Ivan Jurkovič, Vëzhgues i përhershëm i Selisë së Shenjtë pranë Kombeve të Bashkuara të Gjenevës.
Të dhëna të sakta për të moshuarit, që t’u mbrohen të drejtat
Prelati foli në sesionin e 45-të të Këshillit për të drejtat e njeriut, kushtuar Ekspertit të pavarur mbi të drejtat njerëzore, që duhet t’i gëzojnë të gjithë të moshuarit. Në radhë të parë kryeipeshkvi Ivan Jurkovič vuri në dukje se është i nevojshëm sigurimi i të dhënave të sakta e të plota mbi gjendjen e të moshuarve; statistikat, sot të përgjjthshme e me mungesa, synojnë t’i paraqesin të moshuarit si “grup homogjen, ndërsa realiteti është krejt i ndryshëm”. Një perspektivë kaq e kufizuar nuk krijon mundësi as për dëgjimin e kujdesshën të kërkesave të tyre”, e as për vlerësimin e duhur të kontributit, që i japin shoqërisë. Prej këndej, ipeshkvi theksoi nevojën për sigurimin e të dhënave “me cilësi të lartë, të menjëhershme e të besueshme”, në mënyrë që “zbraztësitë lidhur me mbrojtjen e të drejtave të njeriut për këtë shtresë të popullsisë të identifikohen e të plotësohen”. Të dhënat kanë “rëndësi jetike” - pohoi Vëzhguesi i Selisë Shenjte - sepse, siç e tregoi Pandemia, përfaqësojnë një mjet të domosdoshëm për monitorimin e emergjencës shëndetësore”, së cilës i duhen dhënë përgjigje të veçanta për çdo rast.
Asnjë dallim mbi bazë të moshës!
Mendimi i prelatit shkoi, më pas, tek “haraçi i trishtuar”, që i paguan pandemisë pleqtë e shtruar “në shtëpi kurimi e struktura rezidenciale në mbarë botën”. Duke pasur parasysh këtë situatë të tmerrshme - nëvizoi kryeipeshkvi Ivan Jurkovič - është e nevojshme të jepen njoftime të sakta për infektimet nga koronavirusi e për vdekjet, pasojë e kësaj situate, që të mund të përmirësohet, kështu, kontrolli brenda këtyre qendrave. Përsa u përket mjekimeve, përfaqësuesi i Selisë së Shenjtë shprehu shqetësimin për faktin se “vendimet për dhënien e ndihmës mjekësore, duke përfshirë këtu edhe ventilatorët, po merren, a u morën, mbi bazën e moshës së të sëmurëve”. Prandaj ka rëndësi të dorës së parë që protokollet shëndetësore të paraprihen “nga vlerësime të thelluara klinike” dhe “nga një angazhim i qartë” për mbrojtjen e të drejtave e të dinjitetit të çdo njeriu.
Të mbrohen të moshuarit, pasuri e çmuar
Në muajt e fundit - shtoi imzot Jurkovič - një brezni e tërë të moshuarish i pagoi me jetë pasojat e pandemisë, ndonëse kjo brezni përfaqësonte burimin më të çmuar për familjen njerëzore, parë në dritën e historisë, të përvojës e të mësimeve, që u transmeton breznive të reja. “Rrënjë e kujtesës e një populli - pohoi me forcë prelati - të moshuarit duhen mbrojtur; e duhen mbrojtur, sidomos, të drejtat e dinjiteti i tyre. Por, për ta realizuar këtë objektiv kaq të nevojshëm - përfundoi - duhen “të dhënat e plota, të besueshme e të veçanta”, që të mund të zhduken pengesat e sotme e të vlerësohet “ fryti i masave, që po merren në vijim”.