Vatikan: online revista kushtuar Ditës Botërore të Rinisë
Kanë kaluar gati 30 vjet, qëkur revista është dëshmitare zyrtare e dialogut të frytshëm të Atit të Shenjtë me të rinjtë, që takohen me Papën në të katër anët e botës. E botuar nga Fondacioni Gjon Pali II për rininë në një edicion të vetëm, me përmbajtje shumëgjuhëshe, duke nisur nga gjuha angleze, për të vijuar me atë spanjolle, franceze e italiane, WYD Magazine shoqëron çdo ditë botërore të Rinisë, duke dokumentuar zhvillimin, pasuruar me një mori pamjesh e me tekste të shkurtra, por tejet interesante: bëhet, kështu, mjet për t’u mundësuar miliona të rinjve, që morën e do të marrin pjesë në DBR-të, përvojën e tyre, takimet, çastet e paharrueshme të ngjarjes, kur të rinjtë e mbarë botës - e ardhmja e saj - takohen me Krishtin, përmes Papës.
Numri i 25-të i revistës, kushtuar DBR-së së Panamasë 2019, përuron praninë e saj në web në mënyrë të vazhdueshme, pa e tradhtuar formulën e zakonshme të publikimit: shumë foto e, natyrisht, fjalët kyçe të fjalimeve të Papës si dhe jehonën e tyre në dëshmitë e të rinjve, që patën fatin ta jetojnë takimin me Papën Françesku.
Së fundi kujtojmë se një hapësirë i kushtohet edhe Kuvendit “Të rinjtë për shtëpinë e përbashkët. Kthesa ekologjike në veprim”.