Papa, tё dielën rinis lutjen mariane Mbretëresha Qiellit, nё praninё e besimtarëve në shesh
R.SH. - Vatikan
Këtë të diel, mё 31 maj, në ora 10, Papa Françesku do të kremtojë Meshën në ditën e solemnitet tё Rrëshajëve – Shpirtit Shenjt, pa pjesëmarrjen e besimtarëve, në Kapelën e tё Shenjtnueshmit Sakrament tё Eukaristisë në Bazilikën e Vatikanit. Kёshtu njofton zyra e shtypit e Selisë së.
Ndërsa nё ora 12, nga dritarja e studios private tё Pallatit Apostolik, Papa Bergoglio do të rinisë lutjen e uratёs mariane tё mesditës ‘Mbretëresha Qiellit’ me besimtarët në sheshin e Shën Pjetrit. Forcat e rendit do të sigurojnë hyrjen e sigurt në Sheshin e Vatikanit dhe do të kujdesën qё besimtarët e pranishëm tё respektojnë distancën e nevojshme ndërpersonale dhe masat tjera tё sigurisë.
Disa çaste pas dritares së Papës, ku përgatitet lutja mariane
Kur ora në krah të majtë të Bazilikës së Vatikanit troket 12 herë e njëkohësisht dëgjohet fort edhe e shtëna me top nga kodra romake Gianicolo, që shënon mesditën, në Sheshin e Shën Pjetrit, mijëra besimtarë presin, me sy përpjetë, hapjen e perdes së bardhë të dritares së Pallatit Apostolik, që mbarë bota e njeh si “e Engjëllit”. Pas saj Papa tashmë është gati për lutjen mariane. E pikërisht në mesditë, perdja e bardhë hapet, e Papa, pasi përshëndet besimtarët, nis kremtimin e lutjes së Engjëllit të Tënzot ose të Mbretëreshës Qiellore (në periudhën ndërmjet Pashkëve e Rrëshajëve).
Po çfarë ka pas kësaj perdeje?
Pas saj është biblioteka e Papës. Ndonjë karrikë e, natyrisht, edhe rafti i librave, punuar me dru arre. Stil i thjeshtë, i përkorë. Atmosferë dijeje e lutjeje. Gjithçka tregon se Papa e përdor rrallë herë këtë dhomë, prej nga niset Lutja mariane e Mesditës, një nga më të ndjekurat prej besimtarëve të mbarë botës. E kjo, sepse Papёs i pëlqen më shumë të takohet me njerëzit, pa i përjashtuar as librat, kuptohet, të cilët i merr me vete në dhoma tjera të thjeshta tё Vatikanit, për të ndenjur me ta, kur nuk mund të rrijë me njerëzit e pranishëm nga e gjithë bota!
E një nga takimet më të dashura për Papën, është pa dyshim lutja marine e mesditёs e Engjëllit të Tënzot ose të Mbretëreshës Qiellore (në periudhën ndërmjet Pashkëve e Rrëshajëve). Kur orët trokasin dymbëdhjetën, Papa ka arritur tashmë në studio. Me të zakonisht është edhe sekretari i posaçëm, i cili i dorëzon fletën me fjalimin e shkurtër. Kjo, konferenca javore e shtypit, që mban Papa për besimtarët. Aq e ndryshme nga qindra konferenca tjera shtypi, që shtjellohen gjatë javës nëpër botë. Me gojën e tij flet Zoti, e flet edhe jeta javore e mbarë Planetit. Me sukseset, shpresat, po edhe ankthet e dramat e saj të pafundme…
Teksti përgatitet një ditë më parë.
Papa, në fjalimin e shkurtër që i paraprin lutjes, komenton kryesisht leximet biblike tё Meshës të së dielës. Në hartimin e tekstit ndihmohet nga Sekretaria e Shtetit e varianti përfundimtar është gati një ditë para lutjes. Por jo rrallë Papa e plotëson, duke folur lirisht, gjë që e dëgjojmë me kënaqësi shumë shpesh.
Nëse grupet e pranishme dëshirojnë që Ati i Shenjtë Papë t’i kujtojë në lutje, duhet t’ia komunikojnë praninë, duke u vënë në lidhje me Prefekturën e Shtëpisë Papnore ose me Sekretarinë e Shtetit tё Selisё sё Shenjtё. Rëndësi ka të njoftosh me kohë. Zakonisht Papa duket i vetëm në dritare tё Pallatit Apostolik, por ndodh edhe që shoqërohet me ndokënd tjetër, me të rinjtë e lëvizjeve tё ndryshme kishtare si Veprimi Katolik, pёrfaqёsues të Ditëve Botërore të Rinisë ose, kur lutja kremtohet në ditë që kanë të bëjnë me paqen, me … dy pëllumba, të cilët fluturojnë të lirë nga dora e Atit të Shenjtë, të ndjekur nga mijëra sy…Si ogur i mirë për paqen në botë. Kur kremtohet lutja mariane e mesditёs nga Seshi i Shёn Pjetrit nё Vatikan, Papën e shoqërojnë disa rregulltarë, që rrinë pas Tij, para mikrofonave të vendosur aty enkas për ta.
Lutja e parë publike e Engjëllit të Tënzot, më 1954
Na mbetet edhe kurioziteti i fundit: kur nisi zakoni i kremtimit të lutjes mariane nga dritarja “e Engjëllit” nё Pallatin Apostolik tё Vatikani. Është një doke e vonë. Nisi më 15 gushtin e vitit 1954, kur Papa Piu XII lejoi që Radio Vatikani ta transmetonte lutjen e Engjëllit të Tënzot të cilën po e kremtonte në Castelgandolfo, seli verore e papëve. E Papёs Paçeli ky transmetim iu duk shumë interesant. Prej këndej, në vjeshtën e vitit 1954 nisi ta kremtojë lutjen e Engjëllit të Tënzot nga dritarja e studios papnore në Pallatit Apostolik. Që aso kohe në hapësirën e Sheshit të Shën Pjetrit në Vatikan, me pamjen e dy krahëve të hapur të Kishës, që përqafojnë mbarë njerëzimin, kur orët trokasin 12.00, jehon lutja:
Engjëlli i Zotit
“Engjëlli i Zotit iu fal Zojës Mari; e ajo u zu për virtyt të Shpirtit Shenjt.
Të falemi Mari...
Ja shërbëtorja e Hyjit; u bëftë mbi mua si është fjala jote.
Të falemi Mari...
E Fjala u bë njeri; e banoi ndër ne.
Të falemi Mari...
Lutu për ne, o e shenjtnueshmja Nënë e Hyjit; të bëhemi të denjë për premtimet e Jezu Krishtit”.
Mbretëreshë e qiellit (në kohën e Pashkëve)
Mbretëreshë e qiellit, gëzohu, Aleluja!
Se ai që meritove për ta bartur, Aleluja!
U ngjall si pati thënë, Aleluja!
Lute për ne Hyjin, Aleluja!
Gëzohu e galdo, Virgjëra Mari, Aleluja!
Zoti u ngjall me të vërtetë, Aleluja!
Të lutemi: O Zot, që nëpër ngjalljen e Birit tënd, Jezu Krishtit, u denjove ta ngushëllosh botën, bëj që nëpër Nënën e tij, Virgjërën Mari, të fitojmë ngushëllimet e jetës së amshuar. Nëpër Krishtin, Zotin tonë. Amen!
Lutja jehon në vite, që nga viti tashmë i largët 1954, e jehoi edhe sot kur besimtarët e ndoqën përsëri Françeskun i cili, nga dritarja e Engjëllit, komentoi Ungjillin e së dielës e dha bekimin apostolik
