Emergjenca Covid-19, pezullohen seancat gjyqësore në Vatikan
R.SH. - Vatikan
Papa Françesku vendosi të pezullojë veprimtarinë gjyqësore në Shtetin e Vatikanit. Kjo masë parandaluese, për shkak të emergjencës së koronavirusit, njoftohet sot përmes një Reskripti, që mban firmën e Sekretarit të Shtetit, kardinalit Pietro Parolin.
Në dokument thuhet se që nesër e deri më 3 prill “seancat e proceseve në vijim në të gjitha zyrat gjyqësore shtyhen zyrtarisht deri në datën 3 prill 2020”, përveç disa përjashtimeve. Pezullohen edhe të gjitha afatet për çdo lloj akti procedurial e në rastin kur afati fillon gjatë periudhës së pezullimit, shtyhet për fundin e kësaj periudhe. Pezullohen edhe të gjitha afatet e parashkrimit, përveç disa përjashtimeve.
Përjashtimet kanë të bëjnë me ato procedura gjyqësore, që nuk mund të shtyhen, pasi vonesa shkakton dëme të rënda për palët; me ato çështje penale, që nuk e kanë kaluar akoma shkallën e parë të gjykimit; me çështje penale, për të cilat të akuzuarit janë burgosur, ose i nënshtrohen kufizimit të lirisë personale; me çështje penale, për të cilat ka nevojë urgjente të përftohen prova, që s’presin.
Kryetari i Gjykatës së Vatikanit mund të kufizojë hyrjen në zyra, duke garantuar kalimin e personave, që kanë punë urgjente. Vlejnë edhe në Vatikan masat e marra në Itali e në vende të tjera të botës për përdorimin e prenotimeve me internet, të komunikimeve me telefon e me email, për caktimin e orareve fikse të pritjes, si edhe për kryerjen e seancave gjyqësore të domosdoshme me dyer të mbyllura.
“Kjo dispozitë, e miratuar tashmë në Itali, - specifikon nota zyrtare - nuk vlen për veprimtaritë hetimore dhe, në përgjithësi, për ato të kryera para seancës dëgjimore, as për ato procedura, që duhet të trajtohen për arsye urgjente”.