Kërko

Vatican News
 Kardinali Filoni në Makao Kardinali Filoni në Makao 

Do të hapet në shtator, në Makao, Kolegji për ungjillëzimin e Azisë

Një institut për misionet në Azi: bëhet fjalë për “Kolegjin Redemptoris Mater", që do të formojë meshtarët e rinj në misionet e Azisë. Kolegji themelohet nga Kongregata për Ungjillëzimin e Popujve e drejtohet nga Ecja Neocatecumenale. Selia do të jetë Makao, udhë tipike për përhapjen e Ungjillit në Kontinentin aziatik.

R. SH. - Vatikan

Kongregata vatikanase për Ungjillëzimin e Popujve themeloi zyrtarisht Kolegjin Redemptoris Mater, për ungjllëzimin e Azisë, me seli në Makao, rajon autonom i Kinës kontinentale, duke ia besuar drejtimin Ecjes Neokatekumenale. Lajmin e jep agjencia vatikanase Fides.

Hap i rëndësishëm për ungjillëzimin

Edhe pse ish-kolonia portugeze Makao është rajon administrativ i posaçëm, si Hong-Kongu, akti i ish-Propaganda Fides përfaqëson një hap të rëndësishëm përsa i përket veprimtarisë së Kishës në Kinë.

Kolegji u themelua me dekretin e nënshkruar nga kardinali Fernando Filoni, prefekt i Kongregatës Propaganda Fide, më 29 qershorin e kaluar, pas audiencës me Papën Françesku. Do ta nisë veprimtarinë në shtator, me grupin e parë të studentëve, ardhur nga kombe të ndryshme të botës.

Organizmi i seminarit të ri

Siç e sqaron statuti, seminari i ri varet  drejtpërdrejt nga Kongregata për Ungjillëzimin e Popujve, duke mbajtur lidhje me ipeshkvin vendas. Mund të ketë seksione edhe në vende të tjera, sepse është Seminar i madh i Kishës, që ka si synim të përgatisë meshtarët e ardhshën për ungjillëzimin  në Azi.

Për kardinalin Filoni, Kolegji i ri i Nënës së Shëlbuesit, “fryt i frymës krijuese apostolike, që kujdeset për ungjillëzimin në Azi”, shpreh dëshirën për decentrimin e Kongregatës Propaganda Fide. Filoni kujton se në historinë e Misionit të Kishës “ka një mori formash të zgjedhura për kumtimin e Ungjillit në Azi. Mjafton të kujtosh angazhimin e madh të Urdhërave fetare si Jezuitët, Domenikanët e Françeskanët; veprimtarinë e një mori institutesh të veçanta misionare, dërgimin e meshtarëve “fidei donum”, bashkëpunimin misionar ndërdioqezan, format e bashkëpunimit misionar ndërmjet Kishave të disa kombeve ose ndërmjet metropoleve. “Tani Shpirti Shenjt këshillon një formë të re, që do ta eksperimentojmë”.

Azia, kontinenti i pafundmë për t’u ungjillëzuar

Me këtë seminar - vijon kardinali Filoni - deshëm t’i përgjigjemi ftesës së Gjon Palit II që, në fillim të mijëvjeçarit të ri, pati theksuar se “Azia do të ishte kontinenti i pafundmë për t’u ungjillëzuar”  

Kongregata “Propaganda Fide’, me nxitjen e Ecjes Neokatekumenale,  reflektoi gjatë, që ta bënte të vetën këtë thirrje për ungjillëzim në Azi.

E sot, sipas porosive të Papës Françesku, që vijon të ecë mbi gjurmët e Gjon Palit II e na kujton se Kisha duhet të dalë, të hapet e jo të mbyllet në vetvete, menduam se shumë institucione katolike, edhe ata që merren me formimin e me shkollimin, mund ta kenë selinë në kontinente të ndryshme, duke punuar kështu, në drejtim të decentralizmit.

Me këtë frymë – përfundon – “deshëm ta krijojmë në Makao këtë Kolegj për formimin e meshtarëve,  që përgatiten për Azinë”.

30 korrik 2019, 13:23