Që sot, në Vatikan, fillon takimi shpirtëror i krerëve të Sudanit
R.SH. - Vatikan
Papa Françesku miratoi propozimin e kryeipeshkvit të Kanterbërit, Justin Welby, për të organizuar një takim shpirtëror në Vatikan, në Shtëpinë e Shën Martës, më 10 dhe 11 prill, me pjesëmarrjen e autoriteteve më të larta civile dhe kishtare të Sudanit të Jugut. Kështu u shpreh dje në një deklaratë, drejtori i përkohshëm i Sallës së Shtypit të Selisë së Shenjtë, Alessandro Gisotti, i cili që javën e kaluar pati njoftuar për këtë ngjarje në Vatikan.
Pjesëmarrësit civilë dhe kishtarë
Nga autoritetet civile - theksoi Gisoti - marrin pjesë anëtarët e Presidencës së Republikës së Sudanit të Jugut, që sipas Marrëveshjes për Zgjidhjen e Konfliktit do të marrin detyra me përgjegjësi të madhe për kombin, më 12 maj : Salva Kiir Mayardit, President i Republikës, si edhe katër nga pesë nënkryetarët e caktuar: Riek Machar Teny Dhurgon, James Wani Igga, Taban Deng Gai dhe Rebecca Nyandeng De Mabior. Nga ana e autoriteteve kishtare të vendit, marrin pjesë në takim tetë anëtarët e Këshillit të Kishave të Sudanit të Jugut. Predikatarët e këtij takimi, të ngjashëm me ushtrimet shpirtërore, janë imzot John Baptist Odama, kryeipeshkëv i Gulu (Uganda) dhe atë Agbonkhianmeghe Orobator, kryetar i Konferencës së Eprorëve të përgjithshëm të Afrikës dhe Madagaskarit.
Lutje, reflektim dhe pajtim
Kjo ngjarje, e cila është ekumenike dhe diplomatike njëkohësisht, u organizua përmes një marrëveshjeje të Sekretarisë së Shtetit të Vatikanit me Zyrën e kryeipeshkvit të Kanterbërit, për t’u ofruar palëve mundësi për reflektim dhe lutje, për takim e pajtim, në frymën e respektit dhe të mirëbesimit. Në këtë çast historik, pikërisht pjesëmarrësit kanë misionin dhe përgjegjësinë të punojnë për një të ardhme në paqe dhe begati për popullin e Sudanit të Jugut.
Fjalimi i Papës
Çasti përfundimtar i këtyre ushtrimeve shpirtërore të veçanta do të jetë gjatë pasdites të së enjtes, 11 prill, kur, në orën 17:00, Ati i Shenjtë do t’u drejtojë të gjithëve fjalën e tij. Më pas, pjesëmarrësve në takim do t’u jepet një Bibël e nënshkruar nga Papa Françesku, nga Hirësia e tij Justin Welby, kryeipeshkëv i Kanterbërit dhe nga rev. John Chalmers, ish-moderator i Kishës Presbiteriane të Skocisë. Mesazhi i shkruar në të: “Kërko çka bashkon. Kapërce çka ndan”. Së fundi, krerëve të Sudanit të Jugut, që do të angazhohen bashkërisht për paqen, do t’u jepet bekimi.
Përditësuar më 10 prill, ora 10.30