Gëzuar Vitin e Ri nga redaksia shqipe e Vatican News
R.SH. - Vatikan
Gëzuar Vitin e Ri, të dashur dëgjues të Radio Vatikanit dhe shqiptarë kudo që ndodheni, le të ecim së bashku me Zotin e Mëshirshëm e, kështu ky Vit, të jetë i mbarë dhe i lumtur.
Gëzuar Vitin e Ri, që hap para çdo njërit prej nesh e para mbarë njerëzimit një kohë të re. T’i lutemi Zotit të na ndihmojë për të bërë në këtë kohë, atë që na dhuron, atë që dëshiron Ai vetë!
Koha e jetës sonë është e çmuar për t’i dhënë kuptim asaj e të tjerëve, për të medituar se kush jemi e ç’duhet të bëjmë, për të njohur e për të kërkuar, për dashur e për të kuptuar se çdo ditë e Vitit të Ri, që sapo filloi, është një dhanti e një mrekulli!
Ta gëzojmë, pra, ditë për ditë këtë mrekulli që fillon sot! E, së bashku t’i lutemi Hyjit të na japë bekimin hyjnor e t’i kërkojmë, me ndërmjetësi të Marisë Virgjër, Nënës së Zotit, dhuratën e paqes: për familjet tona, qytetet e fshatrat tona, për Atdheun e botën mbarë.
Për shumë vjet!
Me Ty, o Zot, do të ecim çdo ditë
Ja, Viti i Ri
shtigje të reja na hap përpara,
e ecim, pa ditur ku shkojmë,
e presim plot shpresë
ditët e reja.
Ç’na pret këtë vit, o Zot?
si do t’i prijmë
karavanit të gjatë të ditëve
e të netëve?
Ç’do të na dhurojnë
e sidomos
çfarë kanë ndër mend të na mohojnë?
Veç Ti e di, o Zot,
prandaj na fol, e zemrat do t’i hapim
për të pritur Fjalën tënde,
si pritet drita në terr
e zjarri në vatër të fikun.
Na fol, sidomos,
në të ftohtë e nëpër natë,
që shtigjeve të këtij viti të vështirë
të ecim me kujdes,
për të parë në shenjat
që Ti na kumton,
për të shkelur mbi gjurmët e Tua:
për të gjetur shenjat e shpresës sate,
të mirësisë, të paqes, të dashurisë.
E drita jote të na ndrisë,
kur të bëhet natë.
Me ty, o Zot, do të ecim përsëri,
deri te drita e ditës së re,
e Vitit tjetër të Ri.