Kisha dhe budizmi, urë miqësie në një “botë të ngatërruar”

R.SH. - Vatikan

Një histori e gjatë dialogu, filluar nga Papa Pali VI, para 46 vjetësh - me kohë, kthyer në miqësi të vërtetë - është emblematike në botën e sotme, të përfshirë nga dhuna e mosbesimi. Në një mesazh, Këshilli Papnor për Dialogun Ndërfetar kujton zhvillimin e marrëdhënieve ndërmjet Kishës Katolike dhe budizmit tajlandez, në një periudhë të veçantë feste në vendin aziatik. Që nga fillimi i nëntorit e deri këtë të diel, Bangkoku është në qendër të kremtimeve për 230-vjetorin e Tempullit Mbretëror të Chetupon (Wat Pho). Sot, një delegacion i Vatikanit, udhëhequr nga sekretari i Këshillit, imzot Ayuso Guixot, çoi në kryeqytetin e Tajlandës përshëndetjen e Papës Françesku dhe mori pjesë në ceremonitë e ndryshme.

Miqësi, që shëron

         “Prania jonë, sot, - lexohet në mesazhin e dikasterit vatikanas – është shenjë e qartë e lidhjes së miqësisë ndërmjet nesh. Shfrytëzojmë rastin për të falenderuar Asamblenë Sangha të Wat Pho për impenjimin e tyre të vazhdueshëm në dialogun ndërfetar. Vizita jonë kontribuoftë në ndërtimin e urave për të shëruar botën e shqetë të sotme, lënduar nga dhuna, konfliktet, shkurajimi dhe vuajtja e miliona njerëzve”.

Bashkëpunim i ngushtë

         Duke përshëndetur Asamblenë Sangha dhe të gjithë budistët e Tajlandës, mesazhi kujton fjalët e shën Palit VI, i cili, në qershor 1972, duke pritur murgjërit tajlandezë, uronte të fillonte “një dialog gjithnjë e më miqësor dhe një bashkëpunim më i ngushtë ndërmjet traditave të përfaqësuara nga budistët dhe Kishës Katolike”. Edhe Papa Françesku, duke pritur më 16 majin e këtij viti një delegacion budist, pati shprehur “vlerësimin e tij të sinqertë për Wat Pho”. Tempulli, përveç bukurisë së jashtëzakonshme, njihet edhe për shkollën e parë të masazhit Thai, e cila mbetet edhe sot më e rëndësishmja në gjithë Tajlandën, për kontributin që vijon t’i japë mjekësisë tradicionale.