Papa, dhuna ndaj grave është një 'bar helmues' që duhet të zhduket 

R.SH. / Vatikan

“Dhuna ndaj grave është një farë e keqe, si bar helmues që prek shoqërinë tonë dhe që duhet eliminuar nga rrënjët. Këto rrënjë rriten në tokën e paragjykimeve dhe padrejtësive; atyre duhet t'u kundërvihet një veprim edukativ që vendos në qendër personin me dinjitetin e tij”. Kështu shkruan Papa Françesku në faqen @ Pontifex, sot më 25 nëntor 2023 në  Ditën Ndërkombëtare kundër Dhunës ndaj grave që kremtohet në mbarë botën.

Gratë keqtrajtohen nga burracakët

Dita për Eliminimin e Dhunës ndaj Grave, që kremtohet sot (25 nëntor), për Atin e Shenjtë është rast për t'iu kthyer këtij aspekti kaq të rëndësishëm. Mesazhi i Papës për 25 nëntorin e vitit 2020 ishte një mesazh për mbrojtjen e dinjitetit të gruas, për të cilën theksonte:

“Rilindja e njerëzimit filloi me gratë. Gratë janë burimi i jetës. Megjithatë, ato vazhdimisht fyhen, rrahen, përdhunohen, detyrohen të kthehen në prostitua dhe ta mbysin jetën, që mbajnë në bark. Çdo dhunë e ushtruar ndaj grave është përdhosje e Zotit, lindur nga një grua. Nga trupi i një gruaje erdhi shpëtimi për njerëzimin: nga mënyra si e trajtojmë trupin e gruas, shihet niveli ynë i humanizmit”.

Më 25 nëntorin e vitit 2021, nga faqja e tij në Twitter, @pontifex, Papa Françesku përshkroi qartë format e ndryshme të keqtrajtimit, nga të cilat vuajnë shumë gra. I quajti “poshtërsi dhe degradim për burrat e për mbarë njerëzimin", duke i ftuar të gjithë të mos e kthejnë kokën nga ana tjetër. Papa Françesku i drejtohej shoqërisë në tërësi dhe i bënte thirrje të mos dorëzohet para indiferencës, por të ndërmarrë veprime konkrete kundër një fenomeni, i cili, ndër palët e shumta të tij, fsheh dhunën dhe detyrimin.

Të promovohen nënat dhe të mbrohen gratë

"Të punojmë të gjithë për të promovuar nënat dhe për të mbrojtur gratë": kjo ishte thirrja e 1 janarit të këtij viti, në të cilin duke u nisur nga fakti se vetë Kisha është nënë, Papa e ngre lart gruan si lindëse të jetës, veçori femërore, që i shërben Françeskut për të kërkuar shmangien nga "devijimet e pragmatizmit aseptik dhe abstragizmit".

Gjithnjë një më 2021, në emisionin televiziv "Françesku dhe të padukshmit. Papa takon të përvuajturit", Ati i Shenjtë Bergoglio e quante vrasjen e grave (feminicidin) problem “gati satanik, sepse kush kryen veprime të tilla përfiton nga brishtësia e dikujt që nuk mund të mbrohet, mund vetëm t’i presë goditjet. Është poshtëruese, tejet poshtëruese”, denonconte ai.

Format e ndryshme të abuzimit me gratë

Martesat e detyruara, skllavërimi në shtëpi e në punë, janë vetëm disa nga format përmes të cilave abuzohet kundër grave, prandaj, Papa kërkon pa pushim – siç bëri edhe në videomesazh tjetër të viteve të fundit me rastin e Ditës së lutjes dhe të solidaritetit me viktimat e trafikimit njerëzor – maksimumin e indinjatës, sepse "është plagë, që prek secilin prej nesh". Të eliminosh një grua do të thotë t’ia heqësh botës bukurinë, sepse, siç tha Ati i Shenjtë më 8 marsin e kaluar, “gruaja është ajo, që e bën botën të bukur”.

Pse 25 nëntori?

Pse Dita Ndërkombëtare për Eliminimin e Dhjunës kundër grave kremtohet më 25 nëntor? Pikërisht më 25 nëntor 1960, në Republikën Domenikane, tri aktiviste politike, motrat Mirabal (Patria, Minerva dhe Maria Teresa) u vranë me urdhër të diktatorit Rafael Leónidas Trujillo. Atë ditë, ndërsa shkonin për t’u bërë një vizitë burrave të tyre në burg,  motrat Mirabal u bllokuan në rrugë nga agjentët e Shërbimit Informativ Ushtarak. I çuan në një vend të fshehtë dhe i përdhunuan, i torturuan, i masakruan me shkopinj dhe i mbytën. Pastaj, i hodhën me makinën e tyre në greminë, për të simuluar një aksident.

Në vitin 1981, në takimin e parë feminist të Amerikës Latine dhe Karaibeve, mbajtur në Bogota të Kolumbisë, u vendos të kremtohej 25 nëntori si Dita Ndërkombëtare kundër Dhunës ndaj Grave, në kujtim të motrave Mirabal.

Në vitin 1991, Qendra për Lidershipin Global të Grave (CWGL) nisi fushatën e 16 ditëve kundër dhunës me bazë gjinore, duke zhvilluar veprimtari për këtë qëllim nga 25 nëntori deri më 10 dhjetor, Dita Ndërkombëtare e të Drejtave të Njeriut. Kjo traditë vijon edhe sot, duke i mbushur sheshet e botës me këpucë të kuqe, në shenjë solidariteti me gratë viktima të dhunës, por edhe duke realizuar veprimtari të tjera sensibilizimi.

Në vitin 1993, Asambleja e Përgjithshme e Kombeve të Bashkuara miratoi Deklaratën për eliminimin e dhunës kundër grave, duke zyrtarizuar datën e zgjedhur nga aktivistet e Amerikës Latine.