Kremtimet e Papës në periudhën e Krishtlindjes
R.SH. / Vatikan
Të dielën e 24 dhjetorit Mesha e Krishtlindjes që kremtohet nga Papa në Bazilikën e Shën Pjetrit do të mbahet në Kapelën papnore në orën 19.30. Kështu thuhet në Kalendarin e Kremtimeve Liturgjike Papnore, të publikuar sot nga Zyra e Shtypit e Vatikanit. Prandaj edhe këtë vit, Papa e ruan orarin e hershëm që u përurua në vitin 2020, për shkak të kufizimeve të Covid, që u konfirmua më vonë edhe në vitin 2021 dhe 2022.
Urbi et Orbi
Të nesërmen, e hënë 25 dhjetor, ditën e Krishtlindjes së Krishtit Zot, Papa do të japë bekimin apostolik Urbi et Orbi nga Lozha Qendrore e Bazilikës së Shën Pjetrit në orën 12.
Të dielën e 31 dhjetorit në orën 17:00, në Bazilikën e Vatikanit, Papa do të kryesojë kremtimin e lutjes së Mbrëmësores së Parë dhe lutjen e Te Deum në shenjë falënderimi për vitin e kaluar.
Kremtimet e janarit
Të hënën më 1 janar, që është edhe Dita 57-të Botërore e Paqes, Papa Françesku do të kremtojë Meshën e Solemnitetit e Shën Marisë, Nënës së Zotit, përsëri në Bazilikën e Vatikanit, në orën 10.
Gjithnjë në Bazilikën e Shën Pjetrit, më 6 janar do të kremtohet Mesha e Solemnitetit të Dëftimit a Epifanisë së Zotit në orën 10. Së fundi, më 7 janar, Papa do të kryesojë në orën 9.30 një kremtim në Kapelën Sikstine në festën e Pagëzimit të Zotit, gjatë së cilës do të pagëzojë disa fëmijë.
