Françesku: të lutemi për paqen, nga Ukraina në Lindjen e Mesme
R. SH. - Vatikan
Papa i fton të gjithë besimtarët të luten për paqen. Sepse - pohoi me forcë - "kudo që ka luftë", ne "duam paqe". Kështu e mbylli Papa Françesku audiencën e përgjithshme sot paradite, 15 nëntor, në Sheshin e Shën Pjetrit, duke u kërkuar të gjithëve ta lusin Zotin "në mënyrë të veçantë për Ukrainën e martirizuar, e cila vuan kaq shumë", e edhe për paqen "në Tokën Shenjte, Palestinë, Izrael, pa harruar edhe Sudanin, që po vuan prej vitesh”. Ka shumë luftëra, tepër - theksoi Papa - për të vijuar me porosinë:
“Çdo ditë secili të gjejë kohë që të lutet për paqen”.
Dhurimi i gjakut shpëton shumë jetë
Duke iu drejtuar besimtarëve italianë, Françesku përshëndeti Shoqatën e Vullnetarëve të dhurimit të Gjakut, duke nënvizuar "vlerën etike të dhurimit, gjest që ndihmon për shpëtimin e shumë jetëve njerëzore". Më pas, duke i pritur me dashuri skautistët e Agesci të Foligno-s, së bashku me ministrantët e altarit dhe grupin e baritorisë vokacionale, shoqëruar nga familjet, i nxiti fëmijët mbi të gjitha "që të jenë protagonistë të guximshëm në mjediset ku jetojnë":
“Të jeni, sidomos, dëshmitarë gazmorë të Ungjillit, ndërtues të urave dhe kurrë të mureve, kurrë!”.
Për të rinjtë: mirëpriteni edhe kuptimin e sprovave
Duke përshëndetur sërish të rinjtë e shumtë të pranishëm, në veçanti "grupin e madh" të Institutit "Miraglia" të Laurias, Papa nënvizoi se "Javët e fundit të vitit liturgjik na mbushin me ndjenjën e shpresës së krishterë”:
“Ju ftoj ta kuptoni gjithmonë domethënien dhe vlerën e përvojave të përditshme, madje edhe të provave, duke menduar se ‘çdo gjë ndihmon për të mirën e atyre, që e duan Zotin’".
