Papa kryeson mbledhjen e parë të Këshillit të ri të Kardinajve
R. SH. - Vatikan
Mbledhja e Këshillit të Kardinajve filloi sot, në Vatikan, në prani të Papës Françesku. Është takimi i parë i C9-së së re, pas përtëritjes së organizmit nga Papa, më 7 mars.
Anëtarët e Këshillit të ri janë: Kardinali Pietro Parolin, Sekretar i Shtetit; Fernando Vérgez Alzaga, kryetar i Komisionit Papnor për Shtetin e Qytetit të Vatikanit dhe i Guvernatoratit të Shtetit të Qytetit të Vatikanit; Fridolin Ambongo Besungu, Kryeipeshkëv i Kinshasës; Oswald Gracias, Kryeipeshkëv i Bombeit; Seán Patrick O'Malley, Kryeipeshkëv i Bostonit; Juan José Omella Omella, Kryeipeshkëv i Barcelonës; Gérald Lacroix, Kryeipeshkëv i Kebekut; Jean-Claude Hollerich, Kryeipeshkëv i Luksemburgut; Sérgio da Rocha, Kryeipeshkëv i San Salvador de Bahia. Sekretari është Imzot Marco Mellino, ipeshkëv-titullar i Dioqezës së Cresima-s.
Këshilli i Kardinajve u krijua nga Papa Françesku me Kirografin e 28 shtatorit 2013, me detyrën për ta ndihmuar në qeverisjen e Kishës universale dhe për të studiuar një projekt për rishikimin e Kuries Romake, ky i fundit, i realizuar me Kushtetutën e re Apostolike Praedicate Evangelium botuar më 19 mars 2022. Takimi i parë i C9 ishte ai i 1 tetorit 2013. Takimi i fundit, në dhjetor të vitit të kaluar, iu kushtua posaçërisht fazës kontinentale të Sinodit mbi sinodalitetin.
