“Uji dhe shpresa” në një letër të Papës dërguar konferencës së OKB-së për ujin
R.SH. - Vatikan
Kremtohet sot në mbarë botën Dita e Ujit shpallur nga Kombet e Bashkuara. E Papa Françesku, në një letër dërguar organizatorëve të Konferencës së OKB-së kushtuar Ujit, që po mbahet në Nju Jork, nga 22 deri më 24 mars, mes tjerash shpreh “afërsinë, mbështetjen dhe shoqërimin e tij për ngjarjen me temë “Uji dhe shpresa: përvoja dhe sfida për promovimin e zhvillimit të qëndrueshëm dhe të kujdesit për shtëpinë tonë të përbashkët”. Ati i Shenjtë Bergoglio thekson: “shpreh nderimin për organizatat, të cilat janë mbledhur për të kërkuar një zë të përbashkët”.
Kujtojmë se është fjala për Fondacionin e Punonjësve Shëndetësorë për Formimin dhe Zhvillimin (FUTRASAFODE), Konferencën Kishtare të Amazonës (CEAMA), Shoqatën e Inxhinierisë Shëndetësore dhe Ambientale (AIDIS), Shoqatën e Universiteteve Jezuite të Amerikës Latine (AUSJAL), Programin Universitar Amazonik (PUAM), Entin Kombëtar të Veprave Hidrike të Rigjallërimit (ENOHSA) dhe Institutin për Dialogun Global e Kulturën e Takimit (IDGCE).
Fondacioni i Punonjësve Shëndetësorë për Formimin dhe Zhvillimin lindi nga siguria se për natyrën e vet, uji është e drejtë themelore dhe puna është motori i zhvillimit të kombeve në kuadrin e sovranitetit të tyre dhe të respektit për popujt e larminë. Ai frymëzoi krijimin e Institutit Universitar të Ujit dhe të Kanalizimeve, me qëllim thellimin e njohurive shkencore, të formimit profesional, të etikës dhe të administrimit të ujit, me synimin që të gjithë njerëzit të kenë ujë të pijshëm, sanksionuar si e drejtë themelore nga Kombet e Bashkuara, që në vitin 2010.
Në letrën e tij për ngjarjen, që u bë e njohur sot, Papa Françesku vëren se: “Ky takim i veçantë, i cili u shtohet shumë të tjerëve, propozuar nga qindra organizata, së bashku me seancat plenare, me dialogun tematik dhe me të gjitha veprimtaritë e planifikuara, duhet të jetë shtrati i një lumi shprese, i cili duhet t’i bëjë konkrete marrëveshjet e arritura përballë sfidave urgjente të planetit”.
Relatorët synojnë të krijojnë një hapësirë dialogu ku përvojat sektoriale dhe territoriale të pasurohen me veprimtari akademike, politike, fetare dhe komunitare, në mënyrë që të sugjerohen zgjidhje dhe të krijohen elementet dhe kushtet themelore për hartimin e strategjive për skenarët e ardhshëm. Boshtet tematike janë: uji dhe zhvillimi; uji dhe ndryshimet klimatike; roli i shtetit në mbrojtjen e së drejtës së njeriut për ujë; popujt indigjenë dhe e drejta për ujë.
Papa Françesku e përfundon letrën e tij, që mban datën 14 mars 2023, duke theksuar se “duhen bashkuar përpjekjet, duke përfshirë gjithë bashkësinë ndërkombëtare në punën e përbashkët dhe në krijimin e konsensusit për zhvillimin e gjithanshëm të njerëzimit. Shpresoj – shkruan Ati i Shenjtë - që Konferenca e Ujit të jetë boshti, i cili i lidh zgjidhjet që i duhen botës, në mënyrë që, duke garantuar ujin të përmbushim të drejtën universale për ujë, që s’është tjetër veçse e drejta për jetën, për të ardhmen e shpresën. Faleminderit për këtë takim, për impenjimin, për betejat dhe marrëveshjet. Nuk mund t'i frikësohemi debatit, duhet të zhvillohemi me të, për ne dhe për brezat e ardhshëm. Zoti ju bekoftë. Unë lutem për ju, mos harroni të luteni për mua”.
