Papa: uji, pasuri kryesore, nuk duhet të jetë objekt shkapërderdhjeje, shpërdorimi, luftash
R.SH. / Vatikan
“Uji nuk mund të shkapërderdhet, të shpërdorohet apo të bëhet shkak luftash. Duhet të ruhet për të mirën tonë dhe për brezat e ardhshëm”. Kjo, thirrja që bëri sot Papa Françesku, duke iu drejtuar besimtarëve në Sheshin e Shën Pjetrit, në përfundim të audiencës së përgjithshme të së mërkurës.
Duke kujtuar ditën e sotme Botërore të Ujit, shpallur nga OKB-ja, Papa Françesku citoi fjalët e Këngës së Krijesave, të Shën Françeskut: "Lëvduar qofsh, o Zoti im, për ujin vëlla, i cili është shumë i dobishëm, i përvuajtur, i çmuar dhe i dlirë". Duke kujtuar, më pas, Konferencën ndërkombëtare kushtuar ujit, që hapet sot në Nju Jork, kujtoi se lutet për suksesin e punës, duke shpresuar se kjo ngjarje “do të përshpejtojë nismat në favor të atyre, që vuajnë nga mungesa e ujit, kjo pasuri e dorës së parë, pa të cilën nuk ka jetë”.
Duke u ndaluar, më pas, tek solemniteti i Lajmërimit të Zojës, që kremtohet të shtunën, Papa Françesku kujtoi kushtimin e njerëzimit Zemrës së Papërlyer të Marisë, vitin e kaluar, kremtuar me sytë e ngulur mbi Ukrainën dhe Rusinë në luftë.
"Të mos lodhemi kurrë duke ia besuar kauzën e paqes Mbretëreshës së Paqes", shtoi Papa, duke ftuar "çdo besimtar dhe bashkësi, veçanërisht grupet e lutjes, ta përsërisin çdo 25 mars aktin e kushtimit Zojës. Ajo, që është nënë, na ruajtë në unitetin e paqes. Dhe të mos harrojmë këto ditë Ukrainën e martirizuar, që vijon të vuajë”, përfundoi Papa.