Papa emëron Imzot Pawłowski nunc të ri në Greqi

R. SH. - Vatikan

Papa Françesku ka emëruar imzot Jan Romeo Pawłowski, kryeipeshkëv titullar të Sejnyt, ish-sekretar për Përfaqësitë Diplomatike Papnore, nunc të ri apostolik në Greqi.

Duke njoftuar personelin e Sekretarisë së Shtetit të Vatikanit, Kardinali Pietro Parolin prezantoi me këtë rast Imzot Luciano Russo, kryeipeshkëv titullar i Monteverde, i cili qe emëruar nga Papa shtatorin e kaluar si sekretar i ri për Përfaqësitë Diplomatike Papnore.

Kryeipeshkvi Pawłowski lindi në Biskupiec të Polonisë më 23 nëntor 1960. U shugurua meshtar më 1 qershor 1985, u diplomua për të Drejtën Kanonike të Kishës. Hyri në Shërbimin Diplomatik të Selisë së Shenjtë në korrik të vitit 1991 dhe më pas punoi në Përfaqësitë Diplomatike Papnore në Republikën e Afrikës Qendrore dhe në Republikën e Kongos (Brazzaville), Tajlandë, Brazil, Francë dhe në Seksionin e Sekretarisë së Shtetit të Vatikanit për Marrëdhëniet me Shtetet .

Në mars 2009, Benedikti XVI e emëroi kryeipeshkëv titullar të Sejnyt dhe nunc apostolik në Republikën e Kongos dhe Gabon. U shugurua ipeshkëv më 30 prill 2009 në Kishën ‘Zoja Mbretëresha e Martirëve’ në Bydgoszcz, Poloni.

Në dhjetor 2015, Papa Françesku e emëroi delegat për Përfaqësitë Diplomatike Papnore dhe në dhjetor 2020 e konfirmoi në detyrë, me titullin sekretar për Përfaqësitë Papnore. Flet italisht, frëngjisht, rusisht, anglisht, gjermanisht dhe portugalisht.