Drejtorët e revistave të jezuitëve takohen me Papën Françesku
R.SH. - Vatikan
Papa Françesku priti sot paradite, në Vatikan, dhjetë redaktorë të revistave të drejtuara nga jezuitët. Është fjala për revistat kulturore evropiane të Shoqërisë së Jezusit: Stimmen der Zeit (Gjermani), Choisir (Zvicër), Signum (Suedi), Razón y fe (Spanjë), Brotéria (Portugali), Deon (Poloni), A Szív (Hungari) , Viera në život (Sllovaki), Thinking Faith (MB) dhe La Civiltà Cattolica (Itali). Tre redaktorë janë laikë e dy janë gra (për revistat zvicerane dhe angleze). Të tjerët janë rregulltarë jezuitë.
Në audiencë mori pjesë edhe Eprori i përgjithshëm i Shoqërisë së Jezusit, Atë Arturo Sosa Abascal. Biseda zgjati më se një orë, e bazuar mbi “stilin e zakonshëm vëllazëror dhe të drejtpërdrejtë”, shkruan Atë Antonio Spadaro, drejtor i “La Civiltà Cattolica”, në një postim në Twitter. “Nuk u mbajtën fjalime në këtë takim, që ishte dialog i thjeshtë dhe joformal, me pyetje e përgjigje - vijon Atë Spadaro - folëm veçanërisht për luftën në Ukrainë dhe situatën e vështirë që po përjeton bota, por edhe për jetën e kishës, për rrugën e tanishme sinodale dhe misionin e këtyre revistave”. Drejtorët janë në Romë për një takim tre-ditor. Biseda e plotë e këtij takimi, do të publikohet së shpejti nga “La Civiltà Cattolica” dhe nga revistat e vendeve të tjera.