Dita kundër trafikut. Papa: “të shndërrohet ekonomia e trafikut, në ekonomi të kujdesit”
R.SH. - Vatikan
Sot, në të gjithë botën, kremtohet Dita Ndërkombëtare kundër trafikimit të njerëzve. Sipas vlerësimeve të OKB-së, viktimat e trafikimit arrijnë mbi 40 milion vetë, prej të cilëve një e katërta, nën moshën 18-vjeçare, siç denoncon organizata “Save the children”.
Sot, e premte, 30 korrik, kur në mbarë botën kremtohet Dita botërore e themeluar nga OKB-ja për t’iu kundërvënë trafikut të njerëzve, plagë e hapur në trupin e sëmurë të Planetit e njollë e turpshme mbi ballin e mbarë njerëzimit, në faqen papnore të internetit @Pontifex, lexojmë një tweet të ri, përmes të cilit Papa i drejton mbarë botës thirrjen e tij:
“Në#DitënBotërorekundërTrafikut, i ftoj të gjithë të punojnë së bashku me viktimat për ta shndërruar ekonominë e trafikut, në ekonomi të kujdesit”.
Papa Françesku vijon, kështu, ta ftojë njerëzimin të punojë me frymë krijuese, në shërbim të së mirës, duke e luftuar kulturën e hedhurinës e duke mbrojtur të drejtat e njeriut. Kjo do të thotë t’i kundërvihesh me të gjitha forcat shfrytëzimit të njerëzve, t’i ndezësh të gjithë reflektorët e mundshëm mbi një dramë, që shkatërron jetën e grave e të burrave në vende të ndryshme të botës. E ky është edhe qëllimi i Ditës së sotme Botërore kundër trafikut të Njerëzve, shpallur më 2013 nga Asambleja e Përgjithshme e OKB-së, kremtuar sot, më 30 korrik.
Kujdes e respekt
“Duhet të kujdesesh për të afërmin. Ta mjekosh të plagosurin. Ta çlirosh nga skllavëria njeriun, që e shesin në treg, si të ishte bagëti. Në shekullin XXI”. Për këtë punon Talitha Kum, Rrjeti Ndërkombëtar i Jetës rregulltare, që i kushtohet luftës kundër trafikut. E këtë e bën përmes fushatës “Care Against Trafficking”, që nisi një javë më parë, me bindjen se në luftën kundër trafikut, kujdesi mund të ketë njëmijë forma e fytyra: mund të ketë formën e kujdesit për kë është në rrezik, të kujdesit për viktimat e për të mbijetuarit, të çlirimit të skllevërve të botës moderne, etj, etj.
Si një pikë uji në oqeanin pa anë e pa fund, gjatë kësaj fushate në mbarë botën nisën të lulëzojnë një mori nismash, nga kontinenti aziatik, në atë amerikan.
E në të gjitha këto vise, jehon ftesa e re përmes tweetit të Papës: “Punoni së bashku me viktimat, për ta shndërruar ekonominë e trafikut, në ekonomi të kujdesit”.