Papa besimtarëve sllovakë: Nëna e Zotit e përtëriftë fenë e popullit tuaj!
R. SH. - Vatikan
Sláva Isusu Christu! Qoftë lëvduar Jezu Krishti! Me këto fjalë e përfundoi Papa, pas katekizmit të audiencës së përgjithshme, përshëndetjen drejtuar sllovakëve.
Françesku ua drejtoi këto fjalë posaçërisht pjesëmarrësve në shtegtimin e falënderimit të Heparkisë së Košice, që kremton 350-vjetorin e përlotjes së mrekullueshme të Zojës së Klokočov, krysuar nga kryeipeshkvi, imzot Cyril Vasil.
“Ky kremtim i Nënës së Zotit - tha Françesku - e përtëriftë fenë e popullit tuaj dhe besimin në ndërmjetësimin e Saj në udhën tuaj. Ju bekoj me gjithë zemër - shtoi - ju të gjithë dhe Atdheun tuaj”.
Historia e Lotëve të Zojës: çdo lot e ka një histori!
Ikona Nënës së Zotit nderohet në Shenjtëroren greko-katolike të Klokočov, në Sllovaki, ku është e shumënumërt prania e katolikëve lindorë. Lotët mbi ikonën u dukën në vitin 1670, në një periudhë të tronditur nga kryengritjet. Një grup ushtarësh hyri në Kishë, e nxori ikonën jashtë dhe e vuri në shënjestër. E pushkatoi Zojën! Menjëherë pas, nga sytë e ikonës nisën të rrjedhin lotët rrëke. Kohët e fundit u caktua një ditë për përkujtimin liturgjik të lotëve, që vijuan të rrjedhin gjatë nga sytë e Marisë, në ikonë. Festa kremtohet çdo vit në të dielën e parë të tetorit.
Atë Jozef Bartkovjek, drejtues i programit sllovak pranë Radio Vatikanit, e kujton historinë e kësaj ikone, duke nënvizuar se Sllovakia pret një vizitë të Papës në Bratislavë, siç ka thënë vetë Ati i Shenjtë gjatë konferencës së shtypit, në fluturimin e kthimit nga Bagdadi - në Romë.