Papa: të rrimë në “lumin” e Kishës, Shpirti Shenjt bën unitetin!

Lutjen e sotme të Mbretëreshës Qiellore, kremtuar nga Dritarja e Engjëllit, mbi Sheshin e Shën Pjetrit, sot të mbushur plot me njerëz, sinjal  ringjalljeje, Papa e nisi duke cituar librin e Veprave të Apostujve e duke u ndaluar  tek ngjarja që ndodhi në Jeruzalem pesëdhjetë ditë pas Pashkëve të Krishtit. Dishepujt - kujtoi Papa - ishin mbledhur në Çernakull e, me ta, ishte edhe Virgjëra Mari. Zoti i ngjallur u kishte thënë atyre të rrinin në qytet,  derisa ta merrnin nga lart dhuratën e Shpirtit Shenjt. E Shpirti i Zotit u duk me “ushtimën” që u dëgjua papritmas duke ardhur nga qielli, si të ishte “erë e stuhishme”, që e mbushi plot shtëpinë ku ndodheshin. Ishte njëkohësisht përvojë reale e simbolike - kujtoi Françesku.

Shpirti Shenjt, erë e fuqishme dhe e lirë

Kështu iu duk Shpirti Shenjt apostujve, si erë e fortë dhe e lirë.  Si stuhi, që nuk mund të kontrollohet, nuk mund të ndalet, nuk mund të matet;  e as nuk mund të parashikohet drejtimi i Tij. Nuk lejon të ikuadrohet në kërkesat tona njerëzore, në skemat tona, në paragjykimet tona:

“Shpirti vjen nga Zoti Atë e nga Biri i Tij, Jezu Krishti e hyn me rrëmbesë në Kishë e në shpirtin e secilit prej nesh. Ashtu si thotë besojma: ‘Është Zot e jep jetë’”.

Dishepujt, e edhe ne, ditën e Rrëshajëve

Ditën e Rrëshajëve, dishepujt ishin ende të çorientuar, të frikësuar. Nuk e kishin akoma guximin të dilnin hapur. Ishin si ne, që shpesh na pëlqen më shumë të mbyllemi ndërmjet mureve mbrojtëse të mjediseve tona, sesa të dalim në shesh të mejdanit:

“Po Zoti e di ku jemi e vjen e na takon, duke hapur portat e zemrave tona. Ai dërgon mbi ne Shpirtin Shenjt, që na mbështjell e fiton mbi të gjitha mëdyshjet tona, i shemb mbrojtjet tona, i çmonton siguritë tona. Shpirti na bën krijesa të reja, ashtu si i  bëri atë ditë Apostujt”.

Kush e merr Shpirtin Shenjt, nuk është më siç ishte

Dishepujt, pasi e morën Shpirtin Shenjt, nuk ishin më si më parë - kujtoi Papa në lutjen e  Mbretëreshës Qiellore - Nisën sakaq të dalin e të predikojnë e t’u japin të gjithëve lajmin e madh se Krishti i ngjallur është Zoti! E flisnin në një mënyrë, që secili prej dëgjuesve i kuptonte në gjuhën e vet:

“Shpirti Shenjt e shndërron zemrën, e zgjëron vështrimin e dishepujve. I bën të aftë për t’u komunikuar të gjithëve veprat e mëdha të Zotit, duke i kapërcyer kufijtë kulturor e fetarë, brenda të cilëve qenë mësuar  të mendojnë e të jetojnë”.

Shpirti i  bën të aftë  t’i arrijnë të tjerët, duke respektuar mundësitë e tyre  të dëgjimit e të kuptimit, në kulturën e në gjuhën e secilit. Me fjalë të tjera - shpjegoi Papa - Shpirti Shenjt i vë në komunikim me njerëz të ndryshëm,  duke realizuar unitetin dhe universalitetin e Kishës.

T’i hapim zemrat, për dhantitë e Shpirtit Shenjt

T’i hapim edhe sot zemrat tona - ishte ftesa e Papës - për dhuratat e Shpirtit Shenjt, që na bën ta ndjejmë gjithë bukurinë e vërtetësinë e dashurisë së Zotit në Krishtin e vdekur e të ngjallur. E na nxit të dalim, ta dëshmojmë këtë dashuri:

“Bota ka nevojë për guximin, shpresën, fenë e dishepujve të Krishtit. Ka nevojë që ne të bëhemi tharm, kripë e dritë në situata të ndryshme e në kontekste të panumërta kulturore e shoqërore. E gjithë këtë mund ta krijojë vetëm Shpirti Shenjt”.

Kështu ua kujtoi sot Papa besimtarëve atmosferën shungulluese të zbritjes së Shpirtit Shenjt mbi apostujt, të djeshmit e të sotmit, sepse Shpirti i Zotit vijon të zbresë në shekuj mbi këtë botë, që edhe pa e ditur, ka etje për Krishtin. Etje që mund ta shuajnë edhe me ndërmjetësimin e Marisë, së cilës Papa i drejtoi lutjen, në përfundim të Engjëllit:

“Të kërkojmë sot - kujtoi - nga Virgjëra Mari, Nënë e Kishës, të ndërmjetësojë që Shpirti Shenjt të zbresë me begati, t’i mbushë plot zemrat e besimtarëve e të ndezë në to zjarrin e dashurisë së tij”.