Françesku falënderon motër Normën, “engjëll” i migrantëve, ndërmjet SHBA-ve dhe Meksikos
R. SH. - Vatikan
Pesë herë faleminderit! E shqiptoi pesë herë me radhë këtë fjalë të bekuar, që, fatkeqësisht, nuk dëgjohet aq shpesh në kohët tona, Papa Françesku, në videomesazhin drejtuar motër Norma Pimentel, misionare e Jezusit dhe drejtoreshë e Catholic Charities në Rio Grande Valley, ku çdo ditë arrijnë qindra mijëra migrantë nga Amerika Latine. E pikërisht mikpritja dhe asistenca e një morie grash e burrash, të sapolindurish, të moshuarish e familjesh të ndara, në ikje nga mjerimi i padurueshëm, në kërkim të një jete më të mirë, janë në themel të misionit të Motër Normës, bazuar mbi parimin ungjillor: “Isha i huaj e më mikpritët!”.
“Faleminderit për skuadrën tënde!”.
Papa deshi ta falënderojë personalisht rregulltaren për këtë vepër sa fetare, aq edhe humanitare, me një mesazh-video, duke iu përgjigjur kështu një letre, që i kishte dërguar Motra më 3 majin e kaluar: “Faleminderit për këtë që po bëni Ju e gjithë skuadra Juaj”- pohon Papa në videomesazhin, shqiptuar në gjuhën spanjolle:
“Faleminderit për mikpritjen, për strehimin e migrantëve, që vijnë në kërkim të një jete më të mirë: disa vijnë për të përparuar, të tjerë ikin nga ferret e vërteta shoqërore. Faleminderit, motër, faleminderit për skuadrën tuaj!”.
Migrantët duhen mirëpritur, duhen mbrojtur, duhen shoqëruar e integruar!
Françesku ripohon me forcë katër foljet, që duhen përdorur për t’i dhënë përgjigje emergjencës migratore: “Të mirëpresësh, të mbrosh, të shoqërosh e të integrosh!”. Këtë rithekson Papa, për të falënderuar më pas, edhe një herë, motrën dhe skuadrën e saj, për çka bëjnë në ndihmë të njerëzve, që kanë plotësisht të drejtë të kërkojnë një jetë më të denjë për njeriun:
“Ju shoqëroj prej këtu, lutem për ju e për të gjithë njerëzit, që ju shoqërojnë në këtë punë. Zoti i bekoftë!”.
Simbolike, fjala skëterrë, përdorur nga Papa në videomesazh për disa nga viset e Amerikës Latine, por që ka vlerë për të gjitha vendet, ku njeriu ndjehet aq keq, sa të iki nga sytë këmbët nga “skëterrat shoqërore”.