Papa: diplomati i mirë me rrënjë në traditë, është gati për dialog
R. SH. - Vatikan
Kjo mendësi e botës, që të merr frymën, shërohet duke thithur ajrin e pastër të Shpirtit Shenjt, që na çliron nga dashuria për vetveten, fshehur pas një dukjeje rregulltare, në të cilën Zoti mungon krejtësisht. Nuk duhet të lejojmë të na e rrëmbejë kush Ungjillin!”. Me këto fjalë mund të përmblidhet krejtësisht takimi i Papës me bashkësinë e Akademisë Papnore Kishtare (PAE), dje pasdite, pranë Institucionit, në Sheshin e Minervës 74, i cili që prej 320 vjetësh formon personelin e ardhshëm të Përfaqësive papnore.
Ishte takim i thjeshtë e familjar, i karakterizuar nga fryma vëllazërore e afërsia e Pasardhësit të Pjetrit me meshtarët e rinj, që përgatiten për ta jetuar meshtarinë e tyre në shërbim të Kishës e të Atit të Shenjtë në misione të ndryshme diplomatike.
Pak para orës 18.30, Papa u prit nga Kryetari i PAE, imzot Joseph Marino, nga Sekretari për Përfaqësitë Papnore, imzot Jan Romeo Pawłowski, nga Ekonomi dhe Prefekti i studimeve, imzot Gabriel Marcelo Viola Casalongue e nga studentët.
Ishte takim i pritur prej vitesh, i parealizuar për shkak të pandemisë: shenjë konkrete e afërsisë atërore dhe e vëmendjes së Atit të Shenjtë.
Papa u ndalua për më se një orë me meshtarët, në një dialog të thjeshtë e të hapur. Kryetari, në emër të të gjithëve, e përshëndeti dhe e falënderoi Atin e Shenjtë, që iu përgjigj ftesës, duke i paraqitur bashkësinë prej 40 priftërinjsh e 38 studentësh, ardhur nga 25 vende e duke e informuar se, pavarësisht nga kriza shëndetësore shkaktuar nga pandemia, u zhvilluan rregullisht të gjitha veprimtaritë e parashikuara për vitin akademik, me lutje, studim e takime të ndryshme informative.
