Papa lutet për viktimat e përmbytjeve në Indonezi

R. SH. - Vatikan

Më se njëqind të vdekur, por bilanci vijon të përditësohet, për shkak të ciklonit Seroja. Cikloni dëmtoi rëndë Indonezinë Lindore e Timorin Lindor me shira të rrëmbyera, që shkaktuan daljen e lumenjeve nga shtrati dhe përmbytjen e zonave përreth. Shumë nga rrugët u bllokuan e fshatra të tëra mbetën të zhytura në baltë. Flitet për qindra a mijëra të shpërngulur nga zona. Situatë dramatike, të cilën Papa e kujtoi me shqetësim të thellë,  në përfundim të audiencës:

“Dëshiroj të siguroj se i kujtoj në lutje viktimat e përmbytjeve, që i dëmtuan rëndë këto ditë Indonezinë dhe Timorin Lindor. Zoti i pranoftë të vdekurit, i ngushëlloftë familjarët e i ndihmoftë të gjithë ata, që humbën banesën”.

Përmbytje shkatrrimtare në Indonezi e në Timorin Lindor, dhjetra të vdekur

Ndërsa koha shkon drejt përmirësimit, po arrijnë nga të katër anët ndihma në këtë zonë të botës, ku ngjarje të tilla nuk janë të panjohura; shirat stinore shkaktojnë shpesh përmbytje e shkarje dheu, duke dëmtuar rëndë miliona njerëz.