Takimi i parë i Papës Françesku me kryeministrin italian Draghi
R. SH. - Vatikan
Ceremonia e përurimit të vitit të 92-të gjyqësor të Gjykatës së Shtetit të Qytetit të Vatikanit ishte rast për takimin e parë publik të Françeskut me Mario Draghin, në detyrën e kryeministrit. Në fillim të fjalimit, Papa e përshëndeti kryeministrin italian me fjalët: “I shpreh mirënjohjen Kryetarit të Këshillit të Ministrave të Qeverisë Italiane, Mario Draghi, për praninë e tij”.
Kryeminstri, para se të fillonte takimi me Papën, mori pjesë në Meshën, kremtuar në Kapelën Paoline, kryesuar nga sekretari i Shtetit të Vatikanit, kardinali Pietro Parolin, për përurimin e vitit gjyqësor; e, pak para Meshës, u ndalua ca çaste në Kapelën Sikstine.
Papa Françesku e ka pritur në audiencë Mario Draghin kur ishte kryetar i Bankës Qendrore Evropiane, më 19 tetor 2013, së bashku me familjen e tij. E, në korrik të vitit të kaluar e emëroi anëtar të Akademisë Papnore të Shkencave Shoqërore.