Papa largohet nga Iraku. Përfundon një vizitë historike
R.SH. - Vatikan
Papa Françesku largohet nga Iraku ku shkoi si shtegtar i paqes dhe i shpresës me moton ungjillore “Jeni të gjithë vëllezër”. Një vizitë historike, e para e një Pape në vendin e Gjirit Persik, me shumicë myslimane shiite. Shtegtimi i dëshiruar prej kohësh nga Ati i Shenjtë filloi më 5 mars e vijoi për tri ditë, gjatë të cilave Françesku përqafoi një popull, që ka kaluar vuajtje të patregueshme nga konfliktet e terrorizmi, por që ka edhe shpresë për t’u rimëkëmbur e për të rindërtuar një ardhmëri në paqe. Ati i Shenjtë u nis nga nunciatura apostolike sot në mëngjes, për të shkuar me makinë në aeroportin ndërkombëtar të Bagdadit ku arriti rreth orës 7.20 (sipas orës evropiane). Avioni papnor u ngrit në fluturim në orën 7.54.
Ceremonia e lamtumirës
Në aeroport, Papa Françesku u përshëndet nga presidenti i Republikës Barham Ṣalih bashkë me gruan e tij, me të cilët Ati i Shenjtë pati një bisedë prej 10 minutash. Më pas, përshëndetja me përfaqësuesit fetarë e civilë, që e ndoqën në këto tri ditë intensive. Mbërritja e Papës në Romë, pas më se 5 orësh udhëtim, është parashikuar për në 12.45. Menjëherë pas nisjes, në një tweet, presidenti Ṣalih shkruan: “Përshëndesim Shenjtërinë e Tij Papën Françesku, i cili ishte i ftuari ynë në Bagdad, Naxhaf, Ur, Ninive dhe Erbil, ku solli një mesazh të madh humaniteti e solidarizimi me vendin tonë. Prania e tij, shenjë e paqes dhe e dashurisë, do të mbetet përgjithmonë në zemrat e gjithë irakianëve”. Pritet, si zakonisht, biseda e Atit të Shenjtë me gazetarët, që e shoqërojnë në avion.
Telegrami për Shqipërinë
Gjatë kalimit me avion mbi Turqi, Greqi, Shqipëri dhe Itali, Papa Françesku, si zakonisht, u dërgon presidentëve të këtyre vendeve një telegram përshëndetjeje. Mbi Shqipëri, Ati i Shenjtë i dërgoi këtë telegram presidentit Ilir Meta: “Duke hyrë në hapësirën shqiptare, në udhëtim drejt Romës, pas udhëtimit tim apostolik në Irak, ju përshëndes përzemërsisht dhe lutem që Zoti i Gjithpushtetshëm të dikojë mbi ju dhe bashkëqytetarët tuaj çdo bekim për paqe dhe begati”.
Dita e djeshme e Papës
Dje, në ditën e tretë dhe të fundit të veprimtarive të tij në Irak, Bergoglio shkoi në Bagdad, në Mosul, ku u lut mbi rrënojat e luftës e, në kishën e Karakoshit, shkatërruar nga Isisi. Kremtoi edhe meshën së bashku me 10 mijë besimtarë në stadiumin e Erbilit. “Iraku do të mbetet përherë në zemrën time”, tha në fund të kremtimit. Ati i Shenjtë u kërkoi të gjithëve “të punojnë së bashku për një ardhmëri në paqe e begati, që nuk lë pas e nuk diskriminon askënd”.