Kremtimet e Papës për Javën e Madhe. Udha e Kryqit, në Shën Pjetër, me pak besimtarë
R. SH. - Vatikan
Dymbëdhjetë muaj pas Pashkëve 2020, liturgjitë kryesore të vitit kanë të bëjnë përsëri me pandeminë, edhe në zemrën e krishtërimit. Prandaj Java e Madhe e Françeskut do t’i ketë kohët dhe ritmet të modeluara nga kërkesat, imponuar nga Covidi, ndërmjet të cilave, mungesa e turmave, që popullojnë zakonisht takimet, duke nisur nga e Diela e Larit - deri tek ajo e Pashkëve. Të martën e kaluar Salla vatikanase e Shtypit duke komunikuar hollësitë e takimeve papnore, saktësoi se të gjitha do të zhvillohen me praninë e kufizuar të besimtarëve, për të respektuar, kështu, “masat shëndetësore të parashikuara”.
Mesha e Bagmit e së Enjtes së Madhe
Takimet e Javës së Madhe të Pashkëve u hapen dje, me Meshën e së Dielës së Larit, kryesuar nga Papa, që i ftoi besimtarët të mahniten nga Kryqi i Krishtit.
Mesha e Bagmit e së Enjtes së Madhe, do të kremtohet më 1 prill, në orën 10.00, në Altarin e Katedrës, kryesur nga Papa, prania e të cilit, ndërkaq, nuk parashikohet në orën 18.00 për kremtimin in Coena Domini, që do të kryesohet nga kardinali dekan i Kolegjit, Giovanni Battista Re.
Udha e Kryqit edhe sivjet, në tremen e Bazilikës
Dy kremtimet e tjera të Françeskut për të Premten e Madhe janë në program për orën 18.00, me Mundimet e Krishtit, në Shën Pjetër, e, tri orë më pas, në orën 21.00, me Udhën e Kryqit në mondovizion, edhe një herë larg Koloseumit, në Tremen e Bazilikës së Vatikanit. Sivjet - njoftoi përmes një deklarate drejtori i Sallës vatikanase të Shtypit, Matteo Bruni, përgatitjet për meditimet iu besuan Grupit Skaut Agesci “Foligno I”(Umbria) dhe Famullisë romake të Shenjtorëve Martirë të Ugandës. Gjë e veçantë në këtë kremtim do të jenë vizatimet e realizuara nga fëmijët dhe të rinjtë e Shtëpisë-Familje “Nëna e Mëshirës Hyjnore” dhe të Shtëpisë-Familje “Çatia Casal Fattoria”, që të dyja në Romë, e para e drejtuar nga Bijat e Zojës së Dashurisë Hyjnore, e dyta, nga një shoqatë vullnetare.
Në orën 19.30 të së Shtundes së Madhe, 3 prill, Papa do të jetë përsëri në Altarin e Katedrës për nënën e të gjitha netëve pa gjumë, atë të Ngjalljes së Krishtit, e, më pas, të Dielën e Pashkëve, në orën 10.00, në Bazilikën e Vatikanit do të kremtohet Mesha, që do të përfundojë me Mesazhin tradicional dhe bekimin “Urbi et Orbi”- Romës e Botës.
Të nesërmen, e Hëna e Engjëllit, kremtimi i parë i Mbretëreshës Qiellore, nga Biblioteka e Pallatit Apostolik.