Nigeri: lirohet ipeshkvi i rrëmbyer. Imzot Obinna: “Faleminderit Papës e policisë”.
R. SH. - Vatikan
U liruan dje, rreth orës 22.00, në Nigeri, ndihmësi i Owerri, Imzot Moses Chikwe, së bashku me shoferin e tij. Ishin rrëmbyer e keqtrajtuar natën e 27 dhjetorit pranë banesës së prelatit, ndërsa ktheheshin në famulli nga një kremtim.
Thirrja e Papës: të gjinden rrugëzgjidhje për paqen në Jemen
Kryeipeshkvi Obinna, pasi pohon se imzot Chikwe është shëndosh, ndonëse i ligështuar pa masë nga rrëmbimi, falënderon Zotin për lirimin e dy të rrëmbyerve. Ngjarja na kujton menjëherë thirrjen e djeshme të Papës gjatë lutjes së Engjëllit të Tënzot të 1 janarit. Dje, pasi shprehu shqetësimin e tij për thellimin e dhunës në Jemen, me viktima të shumta të pafajshme, Ati i Shenjtë u lut të gjenden rrugëzgjidhje, që krijojnë kushte për t’ua rikthyer paqen këtyre popullsive të martirizuara. I ftoi besimtarët të mendojnë për fëmijët e Jemenit… pa shkollë, pa mjekime, të uritur. E të luten së bashku për Jemenin.
Më pas kërkoi lutje edhe për Kryedioqezën e Owerit, në Nigeri e si dhe për kryeipeshkvin, Moses Chikwe e shoferin e tij:
“T’i lutemi Zotit që ai e të gjitha viktimat e akteve të tilla në Nigeri, të lirohen, e ky vend i dashur të rigjejë sigurinë, harmoninë e paqen”.
Kryeipeshkvi i Overrit, në komunikatën e rastit, falënderon Papën Françesku për thirrjen dhe të gjithë ipeshkvijtë, meshtarët, rregulltarët e laikët, që u lutën për përfundimin e këtij rrëmbimi. Falënderon edhe nuncin apostolik në Nigeri, kryeipeshkvin Antonio G. Filipazzi, duke kujtuar se “mbeti i lidhur me të e me autoritetet vatikanase, gjatë gjithë kësaj ngjarjeje të dhimbshme”.
Nigeria, vend rrëmbimesh
Duhet kujtuar se vetëm një javë para këtij rrëmbimi, me përfundim fatlum, në Ilmo u rrëmbye një rregulltar tjetër katolik, atë Valentine Oluchukwu Ezeagu. Meshtari u kap më 15 dhjetor nga njerëz të armatosur, ndërsa po shkonte në funeralin e të atit. U lirua më 16 dhjetor. Më 30 dhjetor gratë e Chtristian Women Organization (Cwo), organizuan një marshim proteste për të kërkuar lirimin e ipeshkvit dhe shoferit të tij.
