Fnsi e Usi: nga Papa, një qortim për të gjithë gazetarët
R. SH. - Vatikan
Kur Kisha kujtonte Shën Françeskun e Sales, pajtor i gazetarëve, Papa Bergoglio botoi mesazhin e tij për Ditën e 55-të të Komunikimeve shoqërore, me titull: “Eja e shiko. Të komunikosh duke i takuar njerëzit ku e si janë!”
Sot, në përfundim të Engjëllit të Tënzot, Papa iu drejtua të gjithë gazetarëve dhe komunikuesve, duke i nxitur përsëri “të shkojnë e të shikojnë, edhe atje ku askush nuk dëshiron të shkojë - e të dëshmojnë të vërtetën”
Larg pretendimeve
Të shumta, reagimet pozitive për mesazhin papnor, përhapur të shtunën, më 23 janar. Për sekretarin e Bashkimit të Shtypit Katolik (Ucsi) Vania De Luca, mesazhi i Papës është ftesë për t’u dhënë fund pretendimeve të tipit “kjo tashmë dihet”, e për të shkuar, duke holluar shojet e këpucëve, atje ku jetojnë njerëzit, në mënyrë që çdo shprehje e përdorur nga komunikuesit, të jetë e qartë e, sidomos, e ndershme. Si në redaksinë e gezetave, ashtu edhe në internet, në predikmin e Kishës e në komunikimin politik e shoqëror.
Kujtohet, më pas, edhe shprehja e Papës “për t’i ngrënë shojet e këpucëve”, domethënë për të shkuar tek burimi i informimit, duke e ditur fare mirë se informimi vetëvlerësues, “nga pallati”, nuk arrin kurrë të ndriçojë të vërtetën e ngjarjeve. Federata Italiane e Shtypit shton se mesazhi i Papës është qortim për të gjithë gazetarët, që duhet të mbrojnë gjithnjë të vërtetën, pasi të jenë të bindur se është e tillë!
Gazetarët, gjithnjë më pak të lirë
Shtypi nuk duron kufizime, por po i pëson, sidomos gjatë pandemisë së Covid-19. Në dhjetorin e kaluar Chritosphe Deloire, sekretar i përgjithshëm i Reporter Sans Frontieres (Rfs) shkruante se gati 400 gazetarë i kalojnë “pushimet” në pranga, në biruca burgjesh e shpesh me rrezik jete. Numrat e botuar në Raportin vjetor 2020 nga shoqata për lirinë e shtypit, flasin për një tendencë të burgosjes së gazetarëve, në rritje nga viti 2015. 17% në vitet fundit. Situata kritike vërehen në vendet afrikane e në shtetet që qeverisën nga diktaturat, ndërsa në përendim, shpesh janë zotërinjtë e ekonomisë që i kufizojnë lajmet, duke ia mbyllur gojën së vërtetës. Në nivel të përgjithshëm, Evropa vijon të jetë zona më e favorshme për lirinë e shtypit, pa harruar situata problematike në disa vende të BE-së e, sidomos, të Ballkanit. Pas tyre vijnë Amerikat, kryesisht SHBA-ja e Brazili, ku mediat po hasin shumë vështirësi në punën e tyre. Ndërsa Italia kaloi nga vendi i 43-të në vendin e 41-të e në analizë vihet theksi mbi 20 gazetarë italianë, që detyrohen të jetojnë nën mbrojtjen e forcave të rendit, për shkak të kërcënimeve të natyrave të ndryshme, të cilat kanë të bëjnë gjithnjë me kërkimin e së vërtetës e me shojet e ngrëna të këpucëve në kërkim të saj!
Gazetarët e ndershëm nuk mund të mos i përgjigjen thirrjes së Papës për të mbrojtur frymën kritike, përballë sovranizmit, populizmit dhe ekstremizmit, që nuk mund t’i durojnë kundërshtarët, ndërmjet të cilëve, gazetarët e vërtetë, të guximshëm e të ndershëm!
