Papa njofton për 4 shtatorin një ditë lutjeje për Libanin
R. SH. - Vatikan
Është një thirrje e fuqishme për rindërtimim e shpresën në Liban, kjo që Papa i drejton vendit të Kedrave, në përfundim të katekizmit e të përshëndetjeve të audiencës. Pranë tij, një meshtar libanez maronit, Georges Breidy, që mbante në dorë flamurin e vendit të vet:
“Përballë dramave të përsëritura, që i njeh mirë çdo banor i këtij vendi , ne jemi të vetëdijshëm për rrezikun e madh, që kërcënon ekzistencën e Vendit. Libani nuk mund të braktiset në vetminë e vet”
Këtë theksoi Papa, duke vërejtur se “për më se njëqind vjet Libani ka qenë vend shprese” e se “libanezët e ruajtën gjithnjë besimin në Zotin dhe treguan se janë të aftë ta bëjnë tokën e tyre tokë tolerance, respekti, bashkëjetese.
“Është thellësisht i vërtetë pohimi se Libani përfaqëson diçka më shumë se një shtet: Libani është mesazh lirie, është shembull i plularizmit sa për Lindjen, aq edhe për Perëndimin. Për të mirën e vetë vendit, por edhe të botës, nuk mund të lejojmë që kjo trashëgimi të humbasë”- pohoi në vijim Papa.
Ftesë për shpresë e rindërtim
Papa Françesku e inkurajoi pollin libanez të shpresojë e të gjejë energjinë e duhur për t’u rinisur. Politikanëve dhe liderëve fetarë u kërkoi të shikojnë të mirën e përbashkët e “të angazhohen me sinqeritet e transparencë në veprën e rindërtimit”, ndërsa bashkësisë ndërkombëtare, ta mbështesë Vendin. Mendimi i Papës shkoi, më pas, tek të gjithë ata, që u prekën nga atentati i kryeqytetit, të cilëve u drejtoi ftesën:
“Guxim! Feja e lutja të jenë forca juaj. Mos i braktisni shtëpitë tuaja e trashëgiminë tuaj, mos e harroni ëndrrën e atyre, që besuan në ardhmërinë e një vendi të bukur e të begatë”.
Më pas, një thirrje drejtuar barinjve të Kishës vendase, të gjithë priftërinjve, rregulltarëve e rregulltareve, që të jenë pranë popullit të tyre, duke dhënë të parët shembullin e varfërisë e të përvujtërisë, të jenë “veprimtarë të harmonisë” e “të kulturës së vërtetë të takimit”. Vetëm duke shikuar interesin e përbashkët - vijoi Papa - do të jetë e mundur “të sigurohet vazhdimësia e pranisë së krishterë dhe e kontributit tuaj të paçmueshën ndaj Vendit, botës arabe dhe mbarë rajonit, me frymë vëllazërie ndërmjet të gjitha traditave fetare, që janë në Liban”.
Më 4 shtator, një ditë lutjeje e agjërimi
Më pas, njoftimi për nismën e veçantë, që të pranishmit e pritën me duartrokitje:
“Dëshiroj t’i ftoj të gjithë të jetojmë një ditë universale lutjeje e agjërimi për Libanin, të premten e ardhshme, më 4 shtator. Unë mendoj të dërgoj një përfaqësues timin këtë ditë në Liban, për ta shoqëruar popullsinë. Në këtë ditë do të shkojë Sekretari i Shtetit, kardinali Parolin, në emrin tim. E ai do të shkojë për të shprehur afërsinë time e solidaritetin tim. Ta ofrojmë lutjen tonë për gjithë Libanin e për Beirutin. Të jemi pranë edhe me impenjim konkret bamirësie, si në raste e tjera të ngjashme. I ftoj edhe vëllezërit e motrat e konfesioneve dhe të traditave të tjera fetare të bashkohen me këtë nismë, në mënyrën që u duket më e përshtatshme, por të gjithë së bashku”.