Papa Françesku familjeve: përgjegjësi të lartë për vitin e ri shkollor
R. SH. - Vatikan
Papa Françesku iu drejtua familjeve, që morën pjesë shpirtërisht, përmes mediave, në Shtegtimin e 13-të italian në Pompei e Loreto, për të uruar që viti i ri shkollor të jetohet me ndjenjë të lartë përgjegjësie e të vërë në qendër të rinjtë. Mesazhi, nënshkruar nga sekretari i Shtetit, kardinali Pietro Parolin, i drejtohej imzot Stefano Russo, sekretar i përgjithshëm i Konferencës ipeshkvnore italiane, organizator i nismës, së bashku me Përtëritjen në Shpirtin Shenjt (RnS) dhe Forumin kombëtar të Shoqatave familjare, me përkrahjen e Këshillit Papnor për Nxitjen e Ungjillëzimit të Ri. I pranishëm fizikisht, vetëm një grup i vogël besimtarësh, për shkak të rrezikut të infektimit nga Covid-19.
Të merret forcë nga feja e nga solidariteti
Nisma kishte si moto fjalët e Shën Palit apostull, cituar në mesazh: “Gëzohuni, inkurajojeni njëri-tjetrin, kini të njëjtat ndjenja”:.
“Papa Françesku - lexohet në tekst - i përgëzon organizatorët dhe bashkëpunëtorët e nismës që, në këtë kohë kur familjet vuajnë në mënyrë të posaçme nga pasojat e pandemisë, propozuan këtë dëshmi feje e solidariteti, që secili të mund të gjejë, në lutje e në bashkimin vëllazëror, shpresë e forcë për të ecur përpara!
Mendimi i Papës për hapjen e shkollave
Papa uroi që rifillimi i vitit të ri shkollor të jetohet nga të gjithë me ndjenjë të madhe përgjegjësie, në perspektivë të një pakti edukativ, që ka si protagoniste familjen e vë në qendër të rinjtë e të rejat: rritja e tyre e shëndetshme, e mirëformuar dhe e shoqërueshme është kusht për ardhmërinë e qetë e të begatë të mbarë shoqërisë.
Lutja për familjet: urohet që të çojnë kudo jetën e fenë
Mesazhi siguron, në përfundim, se Papa ishte i bashkuar shpirtërisht me shtegtarët “në lutjen drejtuar Marisë, që familjet e krishtera, në Itali, në Evropë e në botë, të vijojnë të formojnë lumin e madh, që i freskon brigjet me fe, me jetë, me shpresë e me dashurinë në popullin e Zotit e në mbarë shoqërinë”.