Tension në Mesdheun lindor, thirrja e Papës për dialog
R. SH. - Vatikan
Një thirrje e re e Papës për dialog konstruktiv në zonën e vatrave të reja të pasigurisë e për respektim të ligjshmërisë ndërkombëtare.
Shqetësimi i Françeskut për Mesdheun Lindor
Papa pohoi se po i ndjek me shqetësim të thellë tensionet në zonën e Mesdheut lindor, rrethuar nga vatra të ndryshme trazirash, duke kërkuar dialog:
“Ju lutem, ju bëj thirrje për dialog konstruktiv e për respektim të ligjshmërisë ndërkombëtare në zgjidhjen e konflikteve, që kërcënojnë paqen e popujve në këtë rajon”.
Shkaqet e tensionit
Tensionet e thelluara javët e fundit në Mesdheun lindor ndërmjet Greqisë e Turqisë, lidhen me çështjen e gazit e të naftës, zbuluar dhjetë vjet më parë. Të dy vendet, që kohët e fundit nënshkruan marrëveshje detare - vitin e kaluar Turqia me Libinë - një vit më parë, Greqia me Egjiptin – janë në kundërshtim lidhur me interpretimin e kufijve përkatës të ujërave territoriale e, prej këndej, edhe me të drejtën e zbulimit e të shfrytëzimit të burimeve energjitike.
Zhvillimet e fundit
Tensionet ndërmjet Ankarasë e Athinës u thelluan pas 10 gushtit, për shkak të anijes eksploruese turke “Oruc Reis”, që nisi punën të hënën e kaluar, e shoqëruar nga një anije luftarake turke. BE-ja e paralajmëroi Turqinë për masa të reja ndëshkimore, duke përfshirë edhe masa të rënda ekonomike, nëse nuk punon për uljen e tensionit. Të mërkurën e kaluar Turqia pranoi të merret vesh me Greqinë, pa parakushte. Vendet evropiane po përpiqen ta zbusin këtë konflikt të ri në Mesdhe. Prej këndej, edhe thirrja e Papës.
Dita botërore e Lutjes për kujdesin ndaj Krijimit
Françesku kujtoi edhe se pasnesër, 1 shtator, kremtohet Dita botërore e lutjes për kujdesin e Krijimit. Nga kjo datë, deri më 4 tetor, do të kremtojmë me vëllezërit tanë të krishterë të Kishave e të traditave të ndryshme, Jubileun e Tokës, për të përkujtuar themelimin, 50 vjet më parë, të Ditës së Tokës – kujtoi Papa pas lutjes së Engjëllit.
Në vijim përshëndeti nismat e ndryshme organizuar në të katër anët e botës. E, ndërmjet tyre, Koncertin, që jepet sot në Katedralen e Port-Louis, kryeqytet i Mauritius ku, për fat të keq, kohët e fundit banorët jetuan çaste të hidhura të një fatkeqësie ambientale.
Përshëndetjet Sheshit
Më pas, përshëndetja aq e pritur nga Sheshi, plot me besimtarë nga Italia e vende të ndryshme të botës:
“Shikoj flamujtë - kujtoi Papa - e përshëndes bashkësinë fetare të Timorit Lindor në Itali; ju lumtë, me flamuj! E edhe shtegtarët e Londrinës e të Formozës nga Brazili si dhe të rinjtë e Grantorto-s, dioqeza e Vicencës. Shikoj edhe flamuj polakë: përshëndetje edhe polakëve! Flamuj argjentinas: edhe argjentinasve përshëndetje. Mirëserdhët të gjithë!”.
“E të gjithëve, të diel të gëzuar!”- uroi, duke shtuar edhe: “Ju lutem, mos harroni ta thoni një uratë për mua. Drekën e mirë e mirupafshim”.