Françesku lutet për ardhmërinë e Sirisë dhe të popujve të rajonit
R. SH. - Vatikan
Në përfundim të lutjes së Engjëllit të Tënzot, Papa kujtoi se më 30 qershor do të mbahet Konferenca e katërt e Bashkimit Evropian dhe e Kombeve të Bashkuara për të “mbështetur ardhmërinë e Sirisë e të rajonit”. Pasuar nga ftesa:
“Të lutemi për këtë takim të rëndësishëm, që të mund ta përmirësojë situatën dramatike të popullit sirian dhe të popujve fqinj, posaçërisht të Libanit, në rrethanat e krizave të rënda shoqërore-politike dhe ekonomike, që pandemia i bëri edhe më të vështira. Mendoni për fëmijët që kanë uri, po nuk kanë çfarë të hanë. U lutem drejtuesve të jenë të zotët për të bërë paqe”.
Më pas, një ftesë e dytë e Papës, që kërkoi lutje edhe për një vend tjetër, në krizë të rëndë, për Jemenin, popullsia e të cilit është shkatërruar nga një luftë, që po zgjat që prej pesë vitesh:
“Ftoj të lutemi edhe për popullsinë e Jemenit, posaçërisht për fëmijët, që vuajnë nga shkaku i krizës së rëndë humanitare. E edhe për të gjithë ata, që u dëmtuan rëndë nga përmbytjet në Ukrainën perëndimore. Uroj t’i ngushëllojë Zoti e t’i ndihmojnë vëllezërit”.
E më pas, përshëndetja drejtuar romakëve e shtegtarëve, ardhur nga Italia e vende të tjera. Posaçërisht atyre, që morën pjesë, sot paradite, në Meshën e kremtuar në ritin kongolez e u lutën për Republikën Demokratike të Kongos.
Përshëndetja drejtuar të gjithëve, në përfundim. Me ftesën për t’u lutur për Papën e me kujtimin për takimin, nesër, në festën e Shenjtorëve Pjetër e Pal, Pajtorë të Romës.