Papa: Shën Katerina nga Siena e mbrojtët Italinë dhe Evropën nga pandemia
R. SH. - Vatikan
Në përfundim të katekizmit, Papa kujtoi edhe një herë se sot Kisha kremton festën e Shën Katerinës nga Siena, doktore e Kishës dhe Bashkëpajtore e Italisë dhe e Evropës, duke i kërkuar mbrojtjen e saj. E Shenjtoren e Madhe Papa e kujtoi edhe gjatë Meshës, kremtuar në Shën Martë, para audiencës.
Papa i lutet Shën Katerinës për Evropën, që të jetë e bashkuar e vëllazërore
Gjatë përshëndetjeve në gjuhën italiane, në përfundim të audiencës së përgjithshme, Ati i Shenjtë nënvizoi, posaçërisht, shembullin e kësaj gruaje të re e guximtare që, ndonëse analfabete, u drejtoi një mori thirrjesh autoriteteve civile dhe fetare, duke i nxitur e edhe duke i ftuar shpesh të mos rrinë dyarkryq, por të veprojnë për t’i zgjidhur problemet shqetësuese të epokës. Ndërmjet tyre, edhe paqësimi i Italisë si dhe rikthimi i Papës nga Avinjoni i Francës, në Romë. Shën Katerina pati një ndikim të fuqishëm mbi jetën civile, edhe në nivelet më të larta të vendit e të Kishës:
“Kjo grua e madhe e mori nga bashkimi i plotë me Jezusin guximin për të vepruar e atë shpresë të pashterrshme, që e ndihmoi të vijonte impenjimin edhe në orët më të vështira, edhe kur gjithçka dukej e humbur, edhe kur pengohej në çdo hap. Ishte Krishti ai, që e ndihmoi të ndikonte mbi të tjerët, edhe mbi prijësit më të lartë civilë e kishtarë, me forcën e pathyeshme të fesë së saj”.
Shembulli i Shën Katerinës - u lut Papa - na ndihmoftë të dimë ta bashkojmë koherencën e krishterë, me dashurinë për Kishën e me angazhimin për shoqërinë civile, posaçërisht në këtë kohë prove.
I lutem Shën Katerinës - tha në vijim Papa - ta mbrojë Italinë gjatë kësaj pandemie e ta mbrojë edhe Evropën, sepse është Pajtorja e saj. Ta mbrojë mbarë Evropën - ritheksoi Ati i Shenjtë - që të mbetet gjithnjë e bashkuar!
Zoti, Provani e të gjithë nevojtarëve të pandemisë
Më pas Papa kujtoi edhe festën e Shën Jozefit punëtor, ndërsa përshëndeste besimtarët e gjuhës franceze:
“Përmes ndërmjetësimit të Tij - pohoi - ia besoj mëshirës së Zotit të gjithë njerëzit, që humbën punën për shkak të pandemisë. Zoti vetë qoftë Provania e të gjithë nevojtarëve e na inkurajoftë për t’i ndihmuar”.
Rruzarja dhe lutja drejtuar Marisë, ndihmë në çaste prove
Papa e ka gjithnjë parasysh dhimbjen e thellë shkaktuar nga Covid-19 e për muajin e majit vë në qendër të vëmendjes Rruzaren. Françesku i nxit të gjithë ta thonë këtë lutje mariane, siç bëri pak ditë më parë me Letrën, kushtuar pikërisht Rruzares. E rikujtoi këtë në përshëndetjen drejtuar besimtarët e gjuhës polake:
“Duke ndjenjur të ngujuar në shtëpi nga shkaku i pandemisë, ta shfrytëzojmë këtë kohë për të rizbuluar bukurinë e Rruzares dhe traditën e funksioneve mariane. Në familje, ose individualisht, lartojini sytë kah Fytyra e Krishtit dhe zemra e Marisë. Ndërmjetësimi i saj amtar ju ndihmoftë për t’i bërë ballë kësaj kohe të jashtëzakonshme prove”.