Papa Françesku na fton të themi Rruzaren. Maria do të na ndihmojë t'i japim fund pandemisë

R.SH. - Vatikan

Letër e Papës kushtuar Rruzares, me të cilën Ati i Shenjtë Françesku i fton besimtarët të luten me të gjatë gjithë kësaj periudhe, kur janë të detyruar të rrinë në shtëpi, por veçanërisht gjatë muajit maj, i cili i kushtohet Zojës së Bekuar.

 “Është traditë, në këtë muaj, - shkruan Ati i Shenjtë – të themi Rruzaren në shtëpi, në familje. Përmasë, kjo shtëpiakja, që kufizimet e pandemisë na kanë ‘detyruar’ ta vlerësojmë, edhe nga pikpamja shpirtërore.

Prandaj, mendova t’u propozoj të gjithëve ta rizbulojnë bukurinë e Rruzares në shtëpi, në muajin e majit. Mund të luteni së bashku, ose secili me veten e vet; vendoseni ju, sipas situatës, duke i vlerësuar të dyja mundësitë. Por, gjithsesi, ka një sekret për ta bërë këtë: thjeshtësia; e është e lehtë të gjenden, edhe në internet, skema të mira lutjeje për t’u ndjekur.

 Përveç kësaj, po ju ofroj tekstet e dy lutjeve për Zojën, që mund t’i thoni në përfundim të Rruzares e që unë vetë do t’i them gjatë muajit të majit, në bashkim shpirtëror me ju. Po ia bashkangjis kësaj letre, që të jenë në dispozicion të të gjithëve.

Të dashur vëllezër e motra – e përfundon letrën e tij Papa – kundrimi i përbashkët i fytyrës së Krishtit, me zemrën e Marisë, Nënës sonë, do të na bashkojë edhe më shumë si familje shpirtërore e do të na ndihmojë ta kapërcejmë këtë sprovë. Unë do të lutem për ju, sidomos për më të vuajturit e ju, lutuni për mua. Ju falënderoj e nga zemra, ju bekoj”.

 Pikërisht në festën e shën Markut ungjilltar, Papa Françesku u dha besimtarëve dy lutjet mariane, për të cilat flet në letër. E para është ajo që vetë Ati i Shenjtë regjistroi në video për kremtimin në shenjtëroren e Dashurisë Hyjnore në Romë, në fillim të pandemisë. Shpesh, edhe ne, e kemi përfunduar emisionin tonë me këtë lutje:

“O Mari,

Ti shndrit gjithnjë në udhët tona,

si shenjë shëlbimi e shprese!

Besojmë në ty, Shëndeti i të sëmurëve.

Në ty, që dhimbjen e Krishtit,

shoqërove me fe të patundur!

Ti, Shpëtimi i popullit romak,

 i  njeh mirë nevojët tona!

 Jemi, prandaj, të sigurt

 se, ashtu si në Kanë të Galilesë,

do  të na e  shndërrosh përsëri

këtë kohë të hidhur prove

në çaste gëzimi e feste!

Ndihmona, o Nënë e Dashurisë Hyjnore,

të ecim në udhën e Atit,

e të bëjmë çka do Krishti,

që mori mbi vete vuajtjet tona,

e u ngarkua me dhimbjet tona,

për të na prirë, me Kryqin në krah,

kah gëzimi i ringjalljes!

Nën mbrojtjen tënde strehë kërkojmë,

o Nëna Shenjte e Zotit!

Mos e përbuz lutjen tonë!  

Lutje e njerëzve në provë!

Çlirona nga çdo rrezik,

O Virgjër e lumnueshme, e bekuar!”

E ja edhe lutja e dytë e Papës Françesku për Zojën:

“Nën mbrojtjen tënde kërkojmë strehë, o Nëna Shenjte e Zotit!”.

Në situatën e sotme dramatike, të ngarkuar me vuajtjen e ankthin, që e kapërthyen botën mbarë, vrapojmë drejt Teje, o Nëna e Zotit e Nëna jonë,  e kërkojmë mbrojtje nën strehën tënde.

O Virgjëra Mari, silli sytë e tu të mëshirshëm kah kjo pandemi e koronavirusit e ngushëlloi ata, që janë të zhytur në dëshpërim e lot për të dashurit e vdekur, shpesh të kallur nën dhe në një mënyrë, që ta plagos më keq shpirtin! Mbroji të pushtuarit nga ankthi për njerëzit e sëmurë të cilëve, për të penguar ngjitjen, nuk munden as t’u afrohen. Ngjall shpresë  në zemrën e njeriut të tmerruar përballë ardhmërisë së paqartë dhe pasojave të sëmundjes mbi ekonominë e mbi punën.

O Nëna e Zotit e Nëna jonë, kërko për ne, nga Zoti, Atë i mëshirës, që kjo provë e rëndë të mbarojë e të rikthehet horizonti i shpresës e i paqes. Ashtu si në Kanë, ndërmjetëso pranë Birit tënd Hyjnor, duke i kërkuar t’i ngushëllojë familjet e të sëmurëve e të viktimave e duke ua hapur zemrën, që të mund të besojnë përsëri.

Mbroji mjekët, infermierët, personelin shëndetësor, vullnetarët, që në këtë kohë emergjence janë në vijën e kufirit e vënë në rrezik jetën e vet, për të shpëtuar jetë të tjera. Shoqëroje mundimin e tyre heroik e jepu forcë, mirësi, shëndet!

Ji pranë atyre, që rrinë natë-ditë mbi kokën e të sëmurëve, e pranë meshtarëve që, me kujdes baritor e impenjim ungjillor, përpiqen t’i ndihmojnë e t’i ngushëllojnë të gjithë.

Virgjër Shenjte, shndriti mendjet e  burrave e të grave të shkencës, që të gjejnë rrugëzgjidhje të drejta për ta mundur virusin.

Ndihmoi Drejtuesit e Kombeve të punojnë me urti, zell e bujari, duke i mbështeur ata, të cilët nuk i kanë as gjërat më të domosdoshme, që duhen për të jetuar, duke programuar rrugëzgjidhje shoqërore dhe ekonomike largpamëse e solidare.

O e Shenjtnueshmja Mari, preki ndërgjegjet, që shumat e mëdha të shpenzuara për të shtuar e për të përsosur armatimet, të përdoren për studime, që mundësojnë parandalimin e katastrofave të tilla në të ardhmen.

O Nënë e shumëdashur, bëj që njerëzit ta kuptojnë se i përkasin një familjeje të vetme, me vetëdijem e lidhjes, që i bashkon. E kështu, me shpirtin vëllazëror e solidar, të mund të japim  ndihmesën tonë në situata të shumta varfërie e mjerimi. Inkurajo forcën në fe, durimin në shërbim, ngulmin në lutje!

O Mari, Ngushëlluesja e të munduarve, rroki të gjithë bijtë e tu të trazuar e  lutju Zotit të ndërhyjë me dorën e tij të gjithëpushtetshme për të na liruar nga kjo epidemi e tmerrshme, që kështu jeta të mund të rifillojë qetësisht udhën e vet normale.

Ta besojmë gjithë vetveten Ty, që shndrit në udhën tonë si shenjë shëlbimi e shprese, o ëmbla, o e buta, o e dhimbshmja  Virgjëra Mari! Amen.