Coronavirus e ndryshoi Javën e Madhe të Papës
R. SH. - Vatikan
Coronavirus nuk mund të mos e ndryshonte edhe programin e kremtimeve të Papës për Javën e Madhe. Riti tejet i lashtë i Udhës së Kryqit në Koloseum, kremtuar për herë të parë në vitin 1750 nga Papa Benedikti XIV për këtë vit jubilar e, më pas, pa asnjë ndërprerje, transmetuar drejtpërdrejt në Tv e Mondovizion që nga viti 1977, sivjet nuk do të kremtohet në Koloseum.
E mungoi edhe tradita e nisur nga Françesku në vitin 2013, viti i parë i papnisë së tij, për ta kremtuar Meshën In Coena Domini të së Enjtes së Madhe jo më në Bazilikën e Shën Pjetrit, sipas traditës, por në një burg, ose në një qendër strehimi për emigrantët, siç ndodhi në vitin 2016, kur për larjen e këmbëve shkoi për vizitë në C.a.r.a. të Catstelnuovo di Porto, në portat e Romës. Riti i larjes së këmbëve sivjet mungoi në të gjitha katedralet dhe famullitë, ku Mesha u kremtua pa besimtarë.
Pak ditë më parë imzot Guido Marini, kreu i Zyës së kremtimeve papnore, i shpjegoi këto risi përmes një note: “Pas situatës së jashtëzakonshme, krijuar për shkak të Covid-19 e duke pasur parasysh udhëzimet e dhëna nga Kongregata për Kultin Hyjnor dhe Disiplinën e Sakramenteve, me Dekretin e datës 25 mars 2020, lindi nevoja - lexohet në një notë - për përditësimin e programit të Kremtimeve Liturgjike, të kryesuara nga Ati i Shenjtë Françesku. Takimet do të mund të ndiqen drejtpërdrejt në home page të Vatican News, në faqen Facebook e drejtpërdrejt në Kanalin Yotube. Do të transmetohen edhe në kanalin e Familjes së Krishterë.
Kremtimet mund të ndiqen drejtpërdrejt në Vatican News e në kanalin tonë
Papa - shpjegon komunikata - do t’i kremtojë Ritet e Javës së Madhe në Altarin e Katedrës të Bazilikës së Shën Pjetrit, duke nisur nga e Diela e Larit. Përsa i përket Triditshit, Mesha in Coena Domini e së Enjtes së Madhe u kremtua mbrëmë, duke nisur nga ora 18.00 e, në të njëjtën orë, Françesku do ta kryesojë sonte, edhe kremtimin e Mundimeve të Zotit të së Premtes së Madhe.
Ndryshon edhe skena tradicionale e Udhës së Kryqit, që sivjet nuk do të mund ta ndjekim me pishtarët klasikë, në sfondin e Koloseumit, por në tremen e Bazilikës vatikanase, duke nisur nga ora 21.00. Meditimet e Udhës së Kryqit sivjet u përgatiten nga famullia e burgut të Padovës Due Palazzi. Gjatë katërmbëdhjetë stacioneve, historia e Mundimeve të Krishtit gërshetohet me katërmbëdhjetë histori nga jeta e të burgosurve, policëve, edukatorëve, vullnetarëve dhe atyre që mbarështojnë drejtësinë. Tekstet u mblodhën e dhe u shkruan nga don Marko Pozza, teolog e kapelan i burgut, dhe nga Tatiana Mario, gazetare vullnetare.
Edhe Nata e Pashkëve do të kremtohet në Altarin e Katedrës, në Bazilikën e Vatikanit e do të fillojë në orën 21.00 të së Shtunës së Madhe, 11 prill, ndërsa të dielë, 12 prill, në orën 11.00, Papa do të kremtojë Meshën e së Dielës së Pashkëve, që do të përfundojë me bekimin solemn Urbi et Orbi.
