Françesku në Engjëllin e Tënzot: me djallin nuk dialogohet kurrë

R. SH. - Vatikan

“Përballë tundimeve, është një udhë e madhe, që mund ta ndjekim!”. Papa Françesku, duke i lidhur fjalët e tij  në lutjen e Engjëllit, me ato të Ungjillit të sotëm, kushtuar kohës së Kreshmëve, kujtoi se po këtë udhë e përshkon edhe Jezusi në shkretëtirë, ku përballon tundimin e shejtanit. Në fillim djalli i kërkon Jezusit, që ka uri, t’i shndërrojë gurët në bukë. Përgjigjja është e padiskutueshme: “Shkrimi i Shenjtë thotë: ‘Njeriu nuk jeton vetëm me bukë, por me çdo fjalë që del nga goja e Hyjit'”. Po djalli, krejt i pakënaqur, vijon tundimin. I kërkon ta vërë në provë besimin në Atin, duke u hedhur nga maja më e lartë e tempullit, sepse, e siguron: “Për ty Hyji do t’i urdhërojë engjëjt e vet,  dhe ata do të të mbajnë para duarsh, që këmba jote të mos vritet në ndonjë gur!”.

 “Kush  e do Zotin - nënvizoi Françesku – i beson mirësisë së Tij,  por pa e vënë kurrë në provë”. Prandaj Jezusi i përgjigjet djallit pa menduar dy herë: “Mos e vërë në provë Zotin, Hyjin tënd”.

Vjen, pastaj, tundimi i tretë. Djalli i mallkuar i ofron Zotit një “perspektivë  mesianiko-politike”. Po Jezusi - kujtoi Papa - nuk e pranon idhujtarinë e pushtetit e të lavdisë njerëzore e, në fund, e dëbon tunduesin, me fjalët:

“Ik, djall, sepse Shkrimi i Shenjtë thotë: ‘Adhuroje Zotin, Hyjin tënd,  dhe shërbeji vetëm Atij!’”.

Atëherë djalli e lë dhe, ja, i afrohen engjëjt dhe i shërbejnë.

Sa më shumë largohemi nga Zoti, aq më të pambrojtur jemi

Jezusi - kujtoi Papa - nuk dialogon me djallin, por i përgjigjet gjithnjë me fjalët e Atit. Me djallin nuk duhet dialoguar kurrë. Duhet të tregohemi shumë të vëmendshëm, kur ndjehet duhma e tij!  Përvoja e Jezusit - vijoi të shpjegojë Papa - duhet të na ndihmojë të jemi vigjilentë, të mos i nënshtrohemi asnjë idhulli:

“Edhe sot shejtani bën çmos të hyjë në jetën e njerëzve, për t’i tunduar me propozimet e tij joshëse; u flet me zërat e atyre, të cilët përpiqen t’ia shurdhojnë ndërgjegjen. Nga të katër anët vijnë mesazhe, që të ftojnë  të mos i kundërvihesh tundimit, ta provosh dehjen e shkeljes së ligjit. Përvoja e Jezusit na mëson se tundimi është orvatje për të ecur në udhë, që nuk janë të Zotit! Udhë, që na krijojnë  idenë se jemi të zotët e vetes, se mund ta gëzojmë jetën, duke e parë si qëllim në vetvete. Po e gjithë kjo s’është tjetër, veçse iluzion, që shuhet shpejt! Ngaqë shpejt kujtohemi se sa më shumë të largohemi nga Zoti, aq më të pambrojtur e më të çarmatosur e ndjejmë veten përballë problemeve të mëdha të jetës. Virgjëra Mari, Nëna e Atij, që ia shtypi kokën gjarpërit, na ndihmoftë në këtë Kohë Kreshmësh të jemi vigjilentë përballë tundimeve e të mos i nënshtrohemi asnjë idhulli të kësaj bote, por ta ndjekim Krishtin në luftën kundër së keqes e të dalim edhe ne fitimtarë, si Zoti”.