Françesku Legjionarëve të Krishtit: vijoni udhën e ripërtëritjes!
R. SH. - Vatikan
Udha e ripërtëritjes “nuk ka përfunduar akoma”: duhet të vijojë, sepse “ndryshimi i mendësisë së njerëzve dhe situatave kërkon shumë kohë për t’u përvetësuar”, prej këndej duhet “kthesë e vazhdueshme”. Këtë thekson Papa Françesku në fjalimin, transmetuar Kapitullit të përgjithshëm të Legjionarëve të Krishtit dhe Asambleve të përgjithshme të Rregulltareve dhe Laikëve të Regnum Christi. Siç njoftoi drejtori i Sallës vatikanase të Shtypit, Matteo Bruni, për shkak se ndjehej pakëz i pamundur, edhe sot paradite Papa, ndonëse i vijoi takimet e programuara në Shën Martë - nuk i priti në audiencë përfaqësitë e Legjionarëve të Krishtit e të Regnum Christi.
Krizë institucionale e personale
Në tekstin, që ua dorëzoi, Françesku u kujton legjionarëve se sjelljet kriminale të themeluesit, atë Marcial Maciel Degollado shkaktuan në gjithë realitetin e Regnum Christi një krizë të fortë, sa institucionale, aq edhe personale. Nuk mund të mohohet se ai ishte themeluesi “historik” i gjithë realitetit, që përfaqësoni - pohon në vijim Papa - por nga ana tjetër, nuk mund ta shikoni si model shenjtërie, që meriton të imitohet. Sepse njeri me dy faqe e me mjete të dyfishta. Qeverisja e gjatë, e përqendruar në duart e tij, e ndoti në një farë mënyre karizmën, që Shpirti Shenjt ia pati dhuruar Kishës në zanafillë. E kjo paqyrohej edhe në normat, si dhe në praktikën e qeverisjes e të dëgjesës në jetën e përditshme.
Kthesa e zemrës dhe e mendjes
Përballë “zbulimit” të kësaj situate - vë në dukje Papa - nuk mungoi kujdesi amtar i Kishës, që vuri pranë bashkësive ekzistuese “njerëz me ndjeshmëri të madhe humane e baritore, si dhe me kompetencë të mirënjohur juridike”.
Më pas Françesku flet për Kushtetutat e për Statutet e përtërira, të cilat i quan “vërtet të reja”. Kujton si u kapëcyen tensionet shumë të forta, gjithnjë të shoqëruara nga Kisha, ndalet tek puna e kryer për kushtetutën e Federatës së Regnum Christi, sot realitet kanonikisht i ri, por edhe i lashtë, e familje e madhe shpirtërore, me statutet e veta e organet e veta të reja të qeverisjes.
Vizion koherent
Françesku ripohon se ndryshimi duhet të vijojë në të gjithë anëtarët e Federatës, që përbëhet nga Instituti i Legjionit të Krishtit, Shoqëria e Jetës Apostolike e të Kushtuarave të Regnum Christi dhe Shoqëria e Jetës Apostolike e Laikëve të Kushtuar të Regnum Christi, në të cilën marrin pjesë një numër i madh laikësh, që nuk i bëjnë kushtet ungjillore, por që përbëjnë, kështu, një familje të vetme shpirtërore, realitet më i gjerë se vetë Federata!
Në përfundim, inkurajimi dhe besimi i plotë i Papës se vetëm ulja me bindje në bankat e shkollës së Shpirtit Shenjt do ta davarisë çdo frikë e çdo dyshim, që trazon shpirtin e pengon vijimin e veprimtarisë.