Françesku: të lutemi për Sirinë e dashur, që gjakoset prej vitesh
R. SH. - Vatikan
Në audiencën e sotme të përgjithshme, Papa kërkoi përsëri lutje për Sirinë, vend i trandur nga lufta që, duke nisur nga viti 2011, shkaktoi mijëra viktima:
“Dëshiroj - tha Papa - që në këtë çast të gjithë të luten për Sirinë e dashur e të martirizuar. Shumë familje, shumë pleq e fëmijë duhet të ikin nga lufta. Siria gjakoset prej vitesh. Të lutemi për Sirinë!”.
Thirrja në lutjen e Engjëllit të Tënzot
Fjalëve të shqiptuara nga Papa pas katekizmit, u shtohet thirrja e fuqishme drejtuar aktorëve në konflikt të dielën e kaluar, gjatë lutjes së Engjëllit të Tënzot:
“Vijojnë të vijnë lajme të dhimbshme nga veri-perëndimi i Sirisë, posaçërisht lidhur me kushtet në të cilat jetojnë shumë gra e fëmijë, njerëz që detyrohen të ikin nga shkaku i shkallëzimit të veprimeve ushtarake. I përsëris thirrjen bashkësisë ndërkombëtare dhe të gjithë aktorëve në konflikt t’i mbështesin mjetet diplomatike, dialogun dhe bisedimet, duke respektuar të Drejtën Humanitare Ndërkombëtare për të shpëtuar jetën dhe fatet e civilëve”.
Dhimbja e Papës për Sirinë: dialogu dhe diplomacia ta ndalojnë luftën!
Gjatë papnisë së tij, Papa Françesku e ka kujtuar më se një herë situatën dramatike në Siri. Në një letër, drejtuar presidentit sirian Bashar Hafez Al-Assad, datuar 28 qershor 2019, e inkurajon kreun e shtetit të Sirisë të tregojë vullnet të mirë për t’i dhënë fund situatës së tmerrshme, pas sulmit kundër qytetit Idlib, në veri-perëndim të vendit. Akoma sot, në këto zona të martirizuara të Sirisë njerëzit vijojnë të vdesin. E shumë detyrohen të largohen nga shtëpitë e tyre.
Kur do t’i jepet fund krizës?
Për Sirinë e dashur Françesku ka bërë më se një herë thirrje, duke nxitur për lutje e për gjetjen e udhëve të dialogut e të paqes. Por, për fat të keq, mbetet ende pa përgjigje pyetja, që bëri Papa në mesazhin Urbi et Orbi të vitit 2013:
“Sa gjak u derdh! E sa vuajtje duhen pësuar akoma, derisa të mund të gjendet rrugëzgjidhja politike e krizës?”.
