Lutja dhe solidariteti i Papës, një vit pas tragjedisë së Brumadinho
R. SH. - Vatikan
Një vit pas tragjedisë së Brumadinho-s, Papa dëshiron të arrijë solidariteti dhe mbështeja e tij tek gjithë viktimat dhe bashkësia lokale.
Orteku i baltës. Kryeipeshkvi i Belo Horizonte: të ndryshohet politika e industrisë së minierave
Katastrofa e madhe ambientale ndodhi pasditen e 25 janarit 2019, pas shembjes së rezervuarit të një miniere hekuri pranë fshatit Córrego do Feijão, në Brumadinho, qytet i shtetit brazilian të Minas Gerais.
Shembja e digës, që përmbante 13 milionë metra kub skorie minerare, ndërmjet të cilave, edhe metale helmuese, si mërkuri, shkaktoi vdekjen e 272 punonjësve të minierës, pronë e shoqërisë Vale, si dhe të disa familjarëve të tyre. Balta dhe mbeturinat vërshuan edhe mbi rrjedhën e lumit, që përshkon territorin, duke shkaktuar një katastrofë të vërtetë ambientale.
Afërsia e Papës Françesku
Në videomesazh, Papa shpreh solidaritetin e tij, duke uruar të punohet me përkushtim për përtëritjen dhe mbojtjen e tokës sonë. Ja fjalët e Atit të Shenjtë:
“Në kryevjetorin e tragjedisë së Brumadinho-s, lutemi për 272 vëllezërit e motrat, që mbetën të varrosur. Shprehim keqardhjen tonë të thellë për ndotjen e gjithë ujit të lumit, solidaritetin ndaj familjeve të viktimave, kryedioqezës dhe të gjithë njerëzve, që vuajnë dhe kanë nevojë për ndihmën tonë. Lutemi që, me ndërmjetësinë e Shën Palit, Zoti të na ndihmojë për ta ruajtur e për ta mbrojtur shtëpinë tonë të përbashkët”.