Lutja e Papës për punëtorët, ata, që e fitojnë me djersë bukën e përditshme
O Zot, Ati ynë, Krijues i qiellit e i dheut, të falënderojmë që na mblodhe
si vëllezër në këtë vend;
përballë këtij shkëmbi të copëtuar nga krahu njerëzor!
Ne po të lutemi për të gjithë punëtorët:
Për ata që s’u pushojnë kurrë duart
e shtypen nën barrën e mundit të madh fizik.
Ruaja korpin nga raskapitja e tepërt;
mos u mungoftë dhembshuria e aftësia për të përkëdhelur!
Jepu forcën e shpirtit e shëndetin e korpit,
që të mos mbeten të shtypur nën barrën e mundit të tyre!
Bëj që fryti i punës
t’u sigurojë një jetë dinjitoze, atyre e familjeve;
e të gjejnë në gjirin e tyre, në muzg, ngrohtësi, rehati, inkurajim,
e, të bashkuar, nën vështrimin e syve të Tu,
të shijojnë gëzimet e vërteta.
Bëj që familjet ta dinë se gëzimi i fitimit të bukës së përditshme
përkryhet, kur kjo bukë thyhet bashkë;
kur fëmijët tanë nuk detyrohen të punojnë,
se mund të shkojnë në shkollë e t’i vijojnë studimet,
e kur mësuesit e tyre mund t’i kushtojnë kohë kësaj detyre
pa pasë nevojë të punojnë gjetiu, për ta përballuar jetesën e përditshme.
O Zot i drejtësisë, preke zemrën e sipërmarrësve dhe të drejtuesve,
që ta mendojnë gjithçka është e nevojshme
për t’u siguruar atyre që punojnë
pagë e kushte të përshtatshme
për dinjitetin e tyre si njerëz!
Kujdesu, me mëshirën tënde atërore,
për të papunët;
bëj që papunësia - shkaktare e mjerimit pa fund –
të zhduket nga shoqëritë tona;
që çdo njeri të njohë gëzimin dhe dinjitetin e atij,
që bukën e përditshme e fiton me djersë të ballit,
për ta çuar në shtëpi e për t’a thyer me të dashurit.
Krijoje ndër punëtorë frymën e solidaritetit të vërtetë,
që kështu të jetojnë përkrah
duke i dhënë njëri-tjetrit guxim,
duke ndihmuar të këputurin
e duke e ringritur në këmbë të rrëzuarin.
Zemra e tyre mos u mbushtë kurrë
me urrejtje, me mllef, me hidhërim
përball padrejtësive, por gjithnjë me shpresë
se do ta shohin, një ditë, botën më të mirë
e do të dinë, së bashku, në mënyrë konstruktive,
t’i mbrojnë të drejtat e veta
e zërat e tyre e britmat, do t’i bëjnë të dëgjohen!
O Zot, Ati ynë, ti na dhurove si Pajtor e Mbrojtës
të punëtorëve të botës mbarë, Shën Jozefin,
atin e kujtuar të Jezusit, fatin guximtar të Virgjërës Mari!
Ia besoj atij të gjithë ata, që punojnë këtu, në Aakamasoa,
e të gjithë punëtorët e Madagaskarit,
posaçërisht ata, që kalojnë ditë të vështira.
Ai i ruajtë në dashurinë e Birit tënd
e i mbështetët në jetën e tyre e në shpresën e tyre!
Amen.