Pa lajmëruar, Papa viziton qytezën “Qielli” të bashkësisë “Nuovi Orizzonti”
R.SH. - Vatikan
Papa Françesku shkoi sot pa lajmëruar në Frosinone, qytet italian i Lacios, ku ndodhet qyteza “Qielli” e bashkësisë “Nuovi Orizzonti” (Horizontet e reja), themeluar në vitin 1993 nga Chiara Amirante. Ajo u jep mikpritje dhe mbështetje njerëzve në nevojë, përmes qendrave të dëgjimit, shtëpive-familje, vendeve dhe laboratorëve për t’u mbledhur e për të mësuar diçka, që ndihmon integrimin në punë. Prej vitesh, këtu shërohen plagët e shpirtit të atyre që, për shkaqe të ndryshme, përfundojnë në tunelin e drogës, të varësive të ndryshme, të lojërave të fatit, të prostitucionit, duke u përjashtuar e refuzuar nga shoqëria e madje, edhe nga vetë familja.
Papa në Frosinone, bashkë me Andrea Bocelli-n
Ishte ora 9.15, kur Ford Focusi blu me Papën Françesku u kthye në rrugën e Frosinone-s, që të çon drejt selisë së bashkësisë. Pak njerëz e dinin se po vinte Ati i Shenjtë, por zërat u përhapën me shpejtësinë e internetit dhe, brenda një kohe të shkurtër, rrjetet shoqërore u mbushën me videot e kalimtarëve, që e kishin parë Papën, ndërsa shumë njerëz filluan të grumbullohen para portave të strukturës, duke shpresuar ta përshëndesnin Françeskun. Lajmi zyrtar mbërriti më vonë e u la të gjithëve përshtypjen se kjo vizitë e së martës ka shijen e atyre të të Premteve të Mëshirës. Papa shoqërohej edhe nga këngëtari i mirënjohur lirik, Andrea Bocelli.
Videomesazh i Papës edhe më 8 qershor
Lidhjet e Atit të Shenjtë me bashkësinë “Nuovi Orizzonti” janë të fuqishme dhe të qëndrueshme. Më 8 qershor, me rastin e 25-vjetorit të bashkësisë, Papa telefonoi për t’i përshëndetur të gjithë, dërgoi një letër dhe një videomesazh për të shprehur dashurinë dhe inkurajimin e tij për më se 3.000 anëtarët e mbledhur për të festuar ngjarjen, në Pallatin e Sportit të Frosinone-s, në Solemnitetin e Rrëshajëve. Gjatë telefonatës, ai përshëndeti veçanërisht të gjithë “Të vegjlit e gëzimit”, siç quhet laikët e shuguruar, që e vënë jetën e tyre në shërbim të bashkësisë.
