Papa, Takimit për Klimën në Nju Jork: “duhet ndershmëri, përgjegjësi dhe guxim”
R.SH. - Vatikan
“Është një nga sfidat kryesore, që duhet të përballojmë, prandaj njerëzimi është i thirrur të kultivojë tre virtyte të mëdha morale: ndershmërinë, përgjegjësinë dhe guximin”. Papa Françesku i përshëndet me këto fjalë pjesëmarrësit në Takimin e OKB-së për Klimën, që u hap sot në Nju Jork. Në videomesazhin e tij (që u paraqit i shkurtuar në OKB), Ati i Shenjtë e lidh ngushtë problemin e pasojave të ndryshimeve të klimës me etikën, barazinë dhe drejtësinë shoqërore.
Propozime konkrete e jo vetëm deklarata
“Climate Action Summit”, takim i krerëve të shteteve e të qeverive botërore, organizuar në kuadrin e asamblesë së përgjithshme të OKB-së, me këmbënguljen e sekretarit të përgjithshëm, Antonio Guterres, duhet të diskutojë mbi përpjekjet e çdo shteti për të zvogëluar emetimet e dioksidit të karbonit në atmosferë dhe për të mbrojtur natyrën. E gjithë kjo, në përgatitje të Konferencës së 25-të Botërore mbi klimën, që do të mbahet në dhjetor në Kili. Guterres i ka kërkuar çdo vendi të paraqesë propozime konkrete e jo vetëm qëllime të mira.
Brenda vitit 2030, emetimi i dioksidit të karbonit duhet zvogëluar me 45%
Në videomesazhin e tij, që vjen menjëherë pas mobilizimit të të rinjve me në krye norvegjezen Greta Thunberg, Papa Françesku përmend Marrëveshjen e Parisit të vitit 2015, objektivat e së cilës akoma janë larg realizimit. Është për t’u pyetur nëse ekziston vullneti politik për t’i zgjidhur çështjet klimatike, nënvizon Ati i Shenjtë. Duhet reduktuar me 45% emetimi i dioksidit të karbonit brenda vitit 2030, duhen bllokuar centralet, që përdorin qymyr dhe, nuk duhet financuar më prodhimi i energjisë nga lëndët djegëse fosile.
Papa: akoma jemi në kohë për ndryshime
“Megjithëse gjendja nuk është e mirë dhe planeti vuan, - ngre zërin Papa në videomesazhin për OKB-në - dritarja e mundësive është ende e hapur. Ende. Jemi akoma në kohë. Të mos e lëmë të mbyllet. Le ta hapim me impenjimin tonë për zhvillimin e gjithanshëm njerëzor, për t’u siguruar brezave të ardhshëm një jetë më të mirë. E ardhmja është e tyre, jo e jona. ‘Ndërsa njerëzimi i periudhës pas-industriale mbase do të mbahet mend si një nga më të papërgjegjshmit në histori, - citon Françesku enciklikën ‘Laudato si’’ – duhet të shpresojmë që njerëzimi i fillimshekullit të 21-të të kujtohet për faktin se ka marrë përsipër bujarisht përgjegjësitë e tij të rënda”.
Të reflektojmë mbi modelet tona të konsumit dhe të prodhimit
E kështu, Papa u kërkon 30 krerëve të shtetit të pranishëm në Nju Jork, ndërmjet të cilëve bie në sy mungesa e presidentit amerikan, Donald Trump, “ndershmëri, përgjegjësi dhe guxim” për ta vënë inteligjencën njerëzore në shërbim të një zhvillimi të shëndetshëm, që i duhet me të vërtetë njeriut.
“Problemi i ndryshimit të klimës - përfundon Ati i Shenjtë, duke u lënë përgjegjësve të kësaj bote tri fjalët, mbi të cilat e bazon videomesazhin e tij - është i lidhur me çështje të etikës, barazisë dhe drejtësisë shoqërore. Gjendja aktuale e degradimit të ambientit është e lidhur me degradimin njerëzor, etik dhe shoqëror, siç e përjetojmë çdo ditë. Kjo na detyron të reflektojmë mbi modelet tona të konsumit dhe të prodhimit dhe mbi proceset e edukimit dhe të vetëdijësimit, për t’i bërë ato koherente me dinjitetin njerëzor. Jemi përballë një ‘sfide qytetërimi’ në favor të së mirës së përbashkët. Dhe kjo është e qartë, siç është e qartë se ka një shumëllojshmëri zgjidhjesh, që mund t’i bëjnë të gjithë, nëse zbatojmë, në nivel personal dhe shoqëror, një stil jete, që mishëron ndershmërinë, guximin dhe përgjegjësinë”.