Papa lutet për Indinë e dërrmuar nga pasojat e shirave
R.SH. - Vatikan
“Me trishtim të thellë”, Papa Françesku bashkohet me dhimbjen e viktimave dhe të gjithë atyre, që kanë mbetur pa shtëpi e pa mjetet më elementare të jetesës në Indi, për shkak të monsoneve të ditëve të fundit, që kanë goditur shtetet e Kerala-s, Karnataka-s, Maharashtra-s dhe Gujarat-it. Me një mesazh, nënshkruar nga Sekretari i Shtetit të Vatikanit, kardinali Pietro Parolin, Papa “u bën ngushëllimet më të ndiera të afërmve të të vdekurve dhe të të plagosurve. Lutet për ata, që po japin ndihmën e parë, ndërsa i kërkon Zotit bekime hyjnore për gjithë kombin e dhuratën e forcës dhe të vendosmërisë” në përballimin e kësaj gjendjeje.
Situata në vendet e jugperëndimit indian keqësohet nga ora në orë. Sipas njoftimeve të fundit të Agjencisë Fides, numri i viktimave ka arritur në 178, ndërsa të shpërngulurit e kanë kaluar një milionëshin. Ipeshkvi i Belgaum dhe administratori apostolik i Karuarit (në Karnataka), imzot Derek Fernandes, deklaron për AsiaNews se ka mundur të vizitojë vetëm disa kampe për të zhvendosurit në zonën Chikodi, pasi zonat e tjera janë të paarritshme.
Veçanërisht e rëndë, gjendja në Kerala, ku regjistrohet rreth gjysma e viktimave. Qeveria i ka dhënë urdhër ushtrisë të formojë njësi për ndërhyrjen e shpejtë dhe të hedhë ushqime me parashutë në zonat e izoluara. Edhe organizatat e Kishës Katolike janë në vijën e parë të frontit për të ndihmuar popullsinë, nënvizon imzot Fernandes.
Fatkeqësisht, sqaron ipeshkvi, shkatërrimet në territor “nuk varen vetëm nga shirat, por, sidomos, nga përmbytja e digave”, ku uji e ka kapërcyer shpesh pikën më të lartë, për shkak të hapjes së rezervuarëve në Maharashtra. “Gjendja është vërtet dramatike”, përfundon imzot Fernandes.