Konventat e Gjenevës. Thirrja e Papës në Engjëllin e Tënzot: të gjithë duhet t'i respektojnë
R. SH. - Vatikan
“Të dashur vëllezër e motra, nesër përkujtohet 70-vjetori i Konventave të Gjenevës, […] që caktojnë kufijtë e përdorimit të forcës dhe kanë për qëllim mbrojtjen e civilëve dhe të të burgosurve në kohë lufte”.
Me këto fjalë Papa Françesku, në përfundim të lutjes së Engjëllit të Tënzot të së dielës, kremtuar në Sheshin e Shën Pjetrit, vuri me forcë në dukje kushtet në të cilat detyrohen të jetojnë popullsitë e vendeve të martirizuara nga lufta.
Të gjithë duhet ta respektojnë të drejtën ndërkombëtare humanitare
“Uroj që ky përkujtim - vijoi Françesku - t’i bëjë shtetet anëtare më të vetëdijshme për nevojën e pamohueshme të mbrojtjes së jetës e të dinjitetit të viktimave të konflikteve të armatosura”.
Duke nënvizuar rëndësinë e mjeteve të tilla juridike ndërkombëtare, Papa ftoi të respektohen:
“Të gjithë e kanë për detyrë t’i respektojnë kufijtë e caktuar nga e drejta ndërkombëtare humanitare, duke mbrojtur popullsitë e pambrojtura dhe strukturat civile, posaçërisht spitalet, shkollat, vendet e kultit, kampet e refugjatëve - pohoi Papa - duke nënvizuar se lufta dhe terrorizmi janë gjithnjë humbje e madhe për mbarë njerëzimin. Disfatë njerëzore”.
Lindja e katër Konventave të Gjenevës
Ishte data 12 gusht 1949 kur, në Gjenevë, u adoptuan katër Konventat për rregulloret e luftës, duke rishikuar marrëveshjet e mëparshme ndërkombëtare. Katër Konventat e Gjenevës i angazhojnë shtetet kontraktuese t’u sigurojnë mbrojtjen e nevojshme civilëve të përfshirë në konflikte e t’u krijojnë kushtet e duhura robërve të luftës si dhe të plagosurve të forcave të armatosura. Konventat u ratifikuan nga 61 shtete, që favorizuan edhe ratifikimin e mëtejshëm nga ana e kombeve të tjera. Shtrirja e konflikteve dhe procesi i dekolonizimit çuan, më pas, në integrimin e katër Konventave, përmes protokolleve shtesë, adoptuar vitet e mëpasme.