Thirrja e Françeskut për refugjatët në Libi dhe viktimat e Afrikës Jugore
R. SH. - Vatikan
Pas lutjes së Mbretëreshës Qiellore të kësaj së Diele II të Pashkëve, Papa Françesku u kujtoi besimtarëve dhe shtegtarëve të mbledhur në Sheshin e Shën Pjetrit, lumnimin e djeshëm, në La Rioja të Argjentinës, të të lumëve Enrique Angel Angelelli, ipeshkëv dioqezan; Carlos de Dios Murias, françeskan konventual; Gabriel Longueville, meshtar francez fidei donum dhe Wenceslao Pedernera, katekist. “Këta martirë të fesë - kujtoi Papa - u persekutuan për shkak të drejtësisë dhe të dashurisë ungjillore. Dëshmia e tyre - uroi akoma - i ndihmoftë posaçërisht ata, që punojnë për një shoqëri më të drejtë e më solidare”.
Thirrje për refugjatët e burgosur në Libi
Pastaj, një mendim për refugjatët në Libi: “Ju ftoj të bashkoheni me lutjen time për refugjatët që ndodhen në qendrat e burgimit në Libi, ku situata, edhe kështu e rëndë, po bëhet gjithnjë më e rrezikshme nga konflikti, në vijim. Bëj thirrje që, posaçërisht gratë, fëmijët e të sëmurët të evakuohen sa më shpejt që të jetë e mundur përmes korridoreve humanitare”.
Lutja për viktimat e përmbytjeve në Afrikën Jugore
Së fundi, Papa kërkoi lutje për viktimat e për ata që pësuan dëme të rënda nga shkaku i përmbytjeve që, kohët e fundit, e dëmtuan Jugun e Afrikës:
“Edhe këtyre vëllezërve tanë - përfundoi - uroj të mos u mungojë solidariteti ynë dhe ndihma konkrete e bashkësisë ndërkombëtare”.