Papa takohet me parukierët: jini të sjellshëm me klientët, larg tundimit të thashethemeve
R. SH. - Vatikan
“Ushtrojeni profesionin tuaj me stil të krishterë, duke i trajtuar klientët me njerëzi e mirësjellje, duke u thënë përherë fjalë të mira dhe inkurajuese e duke u ruajtur nga tundimi i thashethemeve, që i shkon shumë për shtat profesionit tuaj. E dimë të gjithë!”. Për këtë i ftoi Papa parukierët e Komitetit të Shën Martinit de Porres, të cilët i priti sot në audiencë, në Sallën Klementine, me rastin e shtegtimit të tyre në Romë:
“Secili nga ju, në këtë profesion tipik, mund të veprojë gjithnjë me drejtësi, duke sjellë, kështu, një kontribut shumë pozitiv për të mirën e shoqërisë”.
Këtë theksoi Papa në takimin me Komitetin, në të cilin bëjnë pjesë parukierët edhe estetistet e që është i pranishëm në shumë zona italiane:
“Figura e përvuajtur e Shën Martinit de Porres, që Papa Shën Pali VI e shpalli Pajtor të kategorisë suaj më 1966, ju ndihmoftë t’i dëshmoni vazhdimisht vlerat e krishtera” - i uroi Papa, që kujtoi, në vijim, figurën e Shenjtit peruvian:
“Duke qenë metis, u pranua në Urdhërin e Etërve Domenikanë vetëm si terciar e, më pas, edhe si vëlla bashkëpunëtor. E miratoi këtë gjendje, duke kaluar një jetë krejtësisht të përvuajtur, të shndritur nga dashuria e Zotit. U shërbeu me vetmohim të sëmurëve dhe të varfërve, duke u kujdesur për mjekimin e tyre, falë njohurive të marra në një farmaci e, më pas, pranë një berberi-kirurg, sipas zakoneve të kohës”
Shenjtërimi i Shën Martinit de Porres
Martini de Porres u shpall shenjt më 6 maj 1962, nga Papa Shën Gjoni XXIII:
“Me shembullin e jetës së tij - pati nënvizuar gjatë homelisë Papa Roncalli- tregoi se njeriu mund të shëlbohet duke ecur në atë rrugë, që ia mëson vetë Jezusi: nëse para së gjithash e duam Zotin me gjithë zemrën, me gjithë shpirtin e me gjithë mendjen tonë e pastaj, e duam edhe të afërmin si vetveten”.