Cerca

Vatican News
Ushtrimet shpirtërore të Papës dhe të Kuries Romake në Ariccia Ushtrimet shpirtërore të Papës dhe të Kuries Romake në Ariccia  (Vatican Media)

Ushtrimet shpirtërore të Papës në Ariccia: mikpritja si shkollë

Dita e parafundit e ushtrimeve shpirtërore të Papës dhe të Kuries Romake në Shtëpinë e Mësyesit Hyjnor në Ariccia. Meditimi i paradites, mbajtur nga abati Bernardo Francesco Maria Gianni, u përqendrua mbi temën “Flamujt e paqes e të miqësisë” dhe vuri në pah nevojën e mikpritjes.

R.SH. - Vatikan

Nga ushtrimet shpirtërore të Papës e të Kuries Romake në Ariccia ngrihet një thirrje e fuqishme për mikpritje. Zëdhënës për të u bë abati Bernardo Francesco Maria Gianni, predikatari i zgjedhur nga Ati i Shenjtë për meditimet e këtyre ushtrimeve, që do të përfundojnë nesër.

         Reflektimi i abatit u përqendrua në dyert e hapura, përshkruar në Librin e Isaisë profet: “Kaloni, kaloni nëpër dyer, hapjani rrugën popullit”. “Është e bukur – nënvizoi abati – figura e portave të hapura dykanatësh që krejt njerëzimi, më në fund, të hyjë përmes tyre e ta takojë, ta prekë me dorë premtimin e madh të Zotit, që bëhet realitet; të ardhmen, e cila bëhet prani drite, dashurie, paqeje dhe drejtësie për të gjithë ata, që ecin drejt fytyrës së Zotit, udhëhequr nga Fjala e Tij. E kundërt me këtë perspektivë, ndërtimi i çdo muri, i çdo pengese, i çdo baluardi, i cili nuk ka në vetvete një portë mikpritëse, që të fton”.

         “Ati i Shenjtë – kujtoi më pas abati i Shën Miniatit, në Firence – na ka paralajmëruar se po jetojmë një Luftë të tretë Botërore pjesë-pjesë, me fragmente të përzishme në shumë anë të planetit. E është e bukur, profetike, por edhe thellësisht aktuale, thirrja e kryetarit të bashkisë (Giorgio La Pira) për ta kthyer Firencen - por, në të vërtetë, çdo qytet - në vend mikpritës, nga ku të përtërihet një mesazh paqeje e shprese. Kjo është detyrë që Giorgio La Pira ia atribuon shërbimit të tij si njeri i politikës, por është shërbim, që Kisha nuk mund të mos e përkrahë, dëshirojë, propozojë e dëshmojë me fakte për kryetarët e bashkisë e politikanët e gjithë botës, në kohën e sotme. Që qyteti të ribëhet vërtet, sipas perspektivës që na bën të ëndërrojmë Isaia, ‘flamur për gjithë popujt’”.

14 mars 2019, 17:45