Kërko

Vatican News
 Papa gjatë vizitës në Tèmara Papa gjatë vizitës në Tèmara  (AFP or licensors)

Papa viziton Qendrën Shoqërore Tèmara, të "motrave të Zotit"

Sot paradite Papa shkoi në Tèmara, në lagjet e jashtme të Rabatit, për një vizitë private në Qendrën Fshatare të Shërbimeve Shoqërore, ngritur nga motrat vinçenciane.

R. SH. - Vatikan

Sot paradite Papa shkoi në Tèmara, në  lagjet e jashtme të Rabatit, për një vizitë private në Qendrën Fshatare të Shërbimeve Shoqërore, ngritur nga motrat vinçenciane për fëmijët e varfër e të sëmurë.

Vizita u bë me kërkesën e veçantë të Françeskut i cili, në të gjitha shtegtimet baritore, dëshiron të shkelë në qendra bamirësie e mikpritjeje, ku nevojtarët gjejnë një dorë të mëshirshme, që merret me korpin e tyre e një zemër të ndjeshme, që ua ngushëllon shpirtrat e trazuar nga mjerimi. Sapo shkeli në Marok, Kisha vendase i foli për këtë institucion bamirës, nga më aktivët në vend, që njihet si Qendra Fshatare e Shërbimeve Shoqërore e Témarës.

Dëshmia e motrave të Témarës

Është qendër, që punon në sektorin shoqëror, falë veprimtarisë së motrave, të cilat qyteti i quan, me shumë dashuri “rhibat”, në arabisht “motrat e Zotit”. Përkrah tyre punojnë një mori vullnetarësh, që i ofrojnë popullsisë vendase shërbime nga më të ndryshmet, duke nisur nga alfabetizimi i të rriturve, mbështetja shkollore e më të rinjve, shërbimi në mensë,  azili për fëmijë, ndihma psikologjike për nevojtarët e mjekimet për të sëmurët, posaçërisht për ata, që janë në gjendje të rëndë.

Gjatë vizitës së tij private, Papa u prit nga motrat, që punojnë në Qendër, përshëndeti fëmijët e sëmurë të familjeve të varfra dhe pjesëtarët e një kori prej 150 fëmijësh, që e shoqëroi vizitën papnore me këngë gazmore.

 

 

31 mars 2019, 12:11