Leksiku papnor-reflektim mbi fjalët e Françeskut. Sot, shprehja “zemërimi i Zotit” …
R. SH. - Vatikan
Është një enumeracion urdhërash, jo porosish, si zakonisht në Meshët e Atit të Shenjtë:
Mos thuaj: “Mëshira e Zotit është e madhe, do t’m’i falë të gjitha mëkatet!”. E kështu do të endem pa fre në orgjitë e kësaj bote! Mos thuaj kështu. E mos prit gjatë, po bëj kthesë, pendoju sa më shpejt. Sepse çka nuk e sjell dita, e sjell sekondi.
Mos e shtyj ditë më tjetrën pendesën, sepse zemërimi i Zotit mund të shpërthejë pa pritur e pa kujtuar!
E dimë si u lindëm, por asnjëri nga ne nuk mund ta dijë si do t’i vijë fundi.
Shfletoje librin e Siraçidit, e aty do të lexosh:
“Mos u mbështet mbi pasuritë tuaja;
mos thuaj: “Më mjaftojnë”.
Mos iu nënshtro instinktit tënd, e as dëshirave tua,
duke i kënaqur veç ëndjet e zemrës sate.
Mos thuaj: “Kush do të më sundojë?”.
Sepse Zoti s’vonon e të vjen ndeshkimi i Tij!
Mos thuaj: “Mëkatova, po ja ku jam!”,
sepse Zoti është i durueshëm.
Mos të jesh tepër i sigurt për falje,
aq sa të bësh mëkat përmbi mëkat.
Mos thuaj: “Mëshira e tij është e madhe;
e do të m’i falë të gjitha fajet”,
sepse pranë tij është mëshira
por edhe zemërimi,
e pezmatimin do ta shfrejë përmbi mëkatarë.
Ktheju në rrugë të Zotit, mos vono,
ditë më tjetër mos e shtyj,
sepse pa pritur mund t’i shpërthejë zemërimi
e në kohë të ndeshkimit, do të bëhesh hi e pluhur.
Mos u mbështet mbi pasuri të padrejta,
nuk vlejnë asgjë përpara mërisë së Zotit.
Mos e hidh farën në të katër erërat që fryjnë
e mos ndiq çfarëdo rruget
ashtu si bën mëkatari me dy faqe.
S’ duhet ta shpërdorosh mëshirën hyjnore (Sir 4. 1-9)
Mos u josh, prandaj, pas parave! Vëllait tënd mos i zër pritë! Mos e shit për para! E nëse ke shtënë në dorë pushtetin, mos beso se mbahet vetëm me lot e me gjak!
Mos e ndiq instiktin tënd, forcën tënde, duke iu bindur pasioneve të zemrës. Nëse nuk je në gjendje t’i sundosh, do të të sundojnë. Ndalu, para se të ngadhënjejnë mbi ty. E mos beso se mëshira e Zotit është e pakufishme, se ai i Lumi duron pambarimisht e nuk zemërohet përballë asnjë flligshtie. Jo! Edhe Zoti zemërohet.
Nise, prandaj, sot udhën e pendesës, sepse nesër do të jetë vonë! Mos prit të lindë agimi i ri. E dimë se erret, po nuk e dimë nëse do të agojë!
Sepse nuk jemi aspak të sigurt si e kur do të trokasë ora e fundit.
Mjaftojnë vetëm pesë minuta në perëndim të ditës, për të menduar se ka edhe një fund në jetë. E ka edhe një orë, kur Zoti zemërohet e nuk të fal më. Është ora kur nuk mund të bësh më kthesë! Sepse nuk qe në gjendje t’i sundosh pasionet tu!
Po në se bën kthesë, vetë dora e Zotit do të jetë mbi kokën tënde. E do të të shpëtojë ty, fenë tënde e atdheun tënd!