Papa: tek Samaritani i Mirë i Ungjillit, sekreti i identitetit të rregulltarëve
R. SH. - Vatikan
“Në mes të një mori shenjash të vdekjes, mendoni për figurën ungjillore të samaritanit” - kjo, porosia e Françeskut, dhënë rregulltarëve që shërbejnë në spitale:
“Nuk duket se ka shumë mjete, nuk i përket asnjë qendre pushteti, që ta mbështesë, nuk ka tjetër, veç një trastë mbi shpinë. Por ka sy të vëmendshëm e zemër që rreh njëherësh me zemrën e tjetrit e dorë, që shtrihet drejt nevojtarit. E gjithë kjo e shtyn të lërë mënjanë planet e veta e të ndërpresë udhën e nisur. Shqetësimi për jetën e kërcënuar të tjetrit, e nxjerr edhe më shumë në pah dashurinë e tij për njeriun dhe e bën të derdhë pa kursim vaj e verë përmbi plagët e njeriut gjysëm të vdekur”.
Në këtë gjest altruizmi të pastër e humaniteti të madh, fshihet sekreti i identitetit tuaj si njerëz, që shërbejnë në spitale - u kujtoi Papa rregulltarëve me emrin kuptimplotë “bënimirëvëllezër”. Në gjestin e samaritanit, që kujdeset për tjetrin. Që derdh vaj e verë mbi plagët e njeriut, të rënë në dorë cubash. Pikërisht në të do të zbuloni vulën e vetë identitetit tuaj. Vulë, e cila do t’ju ndihmojë ta mbani gjallë në kohë, praninë mëshirëmadhe të Jezusit, që identifikohet me të varfërit, të sëmurët e nevojtarët e i kushtohet plotësisht shërbimit ndaj tyre.
Me dëshminë tuaj e veprat tuaja apostolike ndihmojini të sëmurët dhe nevojtarët, në radhë të parë të varfërit e promovoni baritorinë e shëndetit” - u kujtoi Françesku:
“Jezusi dëshiron ta prekim mjerimin njerëzor, ta prekim korpin e Tij, në korpin e atyre, që vuajnë në korp e në shpirt. Ta prekim, për t’u prekur! Do të na bënte shumë mirë!”.